ខេត្តកោះកុង ៖ លោកស្នងការរង វ័យក្មេង មីន រស្មី ទទួលផែន នគរបាលប្រឆាំង បទល្មើសសេដ្ឋកិច្ច ខេត្តកោះកុង ត្រូវជាកូនលោក យន្ត មីន អតីអភិបាល នៃគណៈអភិបាល ខេត្តព្រះសីហនុ បានបង្កព្យុះភ្លៀង គាបសង្កត់បង្ខំ ឲ្យឈ្មួញរកស៊ីដឹកទំនិញ ឆ្លងកាត់ខេត្តកោះកុង បង់ប្រាក់ ក្បាលឡាន និងបង់ប្រចាំខែ គួរឲ្យញាក់សាច់ ក្នុងខេត្តកោះកុង។
ក្រុមអាជីវករ បានរិះគន់ថា គ្រប់រថយន្ត ដឹកទំនិញ ទាំងគ្រឿងសំណង់ ចាប់ហួយ ប្រហិត ផ្លែឈើ ។ល។ ទោះបីបង់ពន្ធនាំចូល បែបណាក៏ដោយ ឲ្យតែ ដឹកឆ្លងកាត់ ខេត្តកោះកុង មិនអាចគេចផុត ពីក្រសែភ្នែក លោកស្នងការរង មីន រស្មី បានឡើយ ប្រសិនបើមិនបាន បង់ប្រាក់ ថ្លៃក្បាលឡាន ឬបង់ប្រចាំខែ។ ក្រុមអាជីវករ បានលើកឡើងថា ជាទម្លាប់លោក មីន រស្មី បានដាក់កម្លាំង របស់ខ្លួន ឈរជើង នៅចំណុច ស្ថានីយប្រេងឥន្ធនៈតេលា យីហោ រស្មី រតនៈ លើកំណាត់ផ្លូវជាតិ លេខ៤៨ ក្នុងក្រុង ខេមរភូមិន្ទ ខេត្តកោះកុង។
នៅទីនោះ មានរថយន្តឡង់គ្រីស័រ ពណ៌ស ១គ្រឿង សម្រាប់ធ្វើជា មធ្យោបាយ ដេញរថយន្ត ដឹកទំនិញ ដែលមិនចូល បង់ប្រាក់ សូម្បីតែ ប្រជាពលរដ្ឋ រកស៊ីដឹកផ្លែឈើ លក់បន្តិចបន្តួច សម្រាប់ដោះស្រាយ ជីវភាពគ្រួសារ ក៏ប្រឈមទៅនឹង ការធ្វើទុក្ខបុកម្នេញ ពីលោក មីន រស្មី។
សកម្មភាព ប្រើប្រាស់ រថយន្តដេញ កាក់រថយន្ត ដឹកទំនិញ ដ៏ប្រសេកប្រសាច នៅខេត្តកោះកុង មិនត្រឹមតែ នាំឲ្យមានការ ស្អប់ខ្ពើម និងរិះគន់ប៉ុណ្ណោះទេ គឺលោកស្នងការរង បានប្រើប្រាស់ ឥទ្ធិពល ហួសពី តួនាទីភារកិច្ច ក្នុងនាមជាអ្នក ទប់ស្កាត់ និងបង្ក្រាបទំនិញ អំពើរត់ពន្ធ ដើម្បីប្រមូលលុយ ពីឈ្មួញ ជាប្រយោជន៍បុគ្គល ផ្គើនទៅនឹង ការរឹតបន្តឹង របស់អង្គភាពប្រឆាំង អំពើពុករលួយ៕
031 33 03 888