ប្រភពដែលស្និទ្ធនឹងលោក ខឹម ចិត្រា បានឲ្យដឹងថា ទំនងជាលោក ខឹម ចិត្រា ចំណាយដើមទុនយ៉ាងច្រើន ក្នុងការទទួលបានតំណែង ជាមេនគរបាលអន្តោប្រវេសន៍ ច្រកទ្វារអន្តរជាតិប៉ោយប៉ែត ទើប លោក ខឹម ចិត្រា ខំប្រឹងស្រង់ដើមយ៉ាងតក់ក្រហល់ដោយគ្មានញញើតអ្វីឡើយ។ ដូច្នេះលោក ឱម យ៉ិនទៀង ប្រធានអង្គភាពប្រឆាំងអំពើពុករលួយ គួរបើកការស៊ើបអង្កេតទៅលើរឿងអាស្រូវពុករលួយរបស់លោក ខឹម ចិត្រា ជាបន្ទាន់ព្រោះមន្ត្រីនគរបាលរូបនេះទទួលបានតំណែងជានាយប៉ុស្ដិ៍នគរបាលអន្តោប្រវេសន៍ច្រកទ្វារអន្តរជាតិប៉ោយប៉ែត មិនបានប៉ុន្មានថ្ងៃផងក៏ចាប់ផ្ដើមល្បីល្បាញយ៉ាងខ្លាំងខាងប្រព្រឹត្តអំពើពុករលួយ។
សេចក្ដីរាយការណ៍ពីមន្ត្រីពាក់ព័ន្ធនៅច្រកទ្វារអន្តរជាតិប៉ោយប៉ែត ក្រុងប៉ោយប៉ែត បានឲ្យដឹងថា លោក ខឹម ចិត្រា ដែលទទួលបានតំណែងជាមេនគរបាលអន្តោប្រវេសន៍ច្រកទ្វារអន្តរជាតិប៉ោយប៉ែត ជំនួសលោក ស៊ឹម សំអាត កាលពីពេលថ្មីៗនេះកំពុងប្រើអំណាចប្រព្រឹត្តអំពើពុករលួយយ៉ាងខ្លាំងក្លាជាងមុន ។ បញ្ហានេះគឺជារឿងដែលនាយឧត្តមសេនីយ៍ គៀត ច័ន្ទថារិទ្ធ អគ្គនាយកនៃអគ្គនាយកដ្ឋាននគរបាលអន្តោប្រវេសន៍ ក្រសួងមហាផ្ទៃ ក៏ដូចជានាយឧត្តមសេនីយ៍ នេត សាវឿន អគ្គស្នងការនគរបាលជាតិ មិនគួរបណ្ដែតបណ្ដោយឲ្យលោក ខឹម ចិត្រា និងបក្ខពួកធ្វើអ្វីៗស្រេចតែអំពើចិត្តតទៅទៀតឡើយ។ បើមិនដូច្នេះទេលោក ខឹម ចិត្រា ដែលអាងមានខ្នងបង្អែករឹងមាំប្រាកដជាបន្តប្រព្រឹត្តអំពើពុករលួយ និងទង្វើមិនប្រក្រតីផ្សេងៗដោយគ្មានញញើតអ្វីទាំងអស់ ដើម្បីផលប្រយោជន៍ផ្ទាល់ខ្លួន។
ប្រភពពីប្រជាពលរដ្ឋដែលចេញចូលតាមច្រកទ្វារអន្តរជាតិប៉ោយប៉ែត បានឲ្យដឹងថា លោក ខឹម ចិត្រា កំពុងធ្វើសកម្មភាពប្រព្រឹត្តអំពើពុករលួយគាបយកលុយពីពលរដ្ឋខ្មែរ ក៏ដូចជាភ្ញៀវទេសចរចេញចូលតាមច្រកនេះដោយគ្មានញញើតអ្វីឡើយ។ អំពើពុករលួយរបស់លោក ខឹម ចិត្រា និងបក្ខពួកដែលឃុបឃិតជាមួយភាគីសៀម គឺទី១-ជំរិតយកលុយខុសច្បាប់ពីពលរដ្ឋខ្មែរក្នុងម្នាក់ៗ៥០បាតឬប្រមាណ៧០០០រៀលនៅពេលវ៉ៃត្រាលើប័ណ្ណព្រំដែនចេញពីប្រទេសកម្ពុជាឆ្លងចូលប្រទេសសៀម។ ទី២-ធ្វើលិខិតបញ្ជាក់មួយសន្លឹកតម្លៃ២០០បាតសម្រាប់ប្រជាពលរដ្ឋនៅក្រុងប៉ោយប៉ែត ដើម្បីថតរូបធ្វើកាតចូលទឹកដីសៀម។ ទី៣-ធ្វើលិខិតបញ្ជាក់១សន្លឹក២០០បាតនិង៤០០បាតផ្សេងទៀតសម្រាប់ថតប័ណ្ណចូលប្រទេសសៀមចំពោះប្រជាពលរដ្ឋមកពីបណ្ដាខេត្តផ្សេងៗក្រៅពីក្រុងប៉ោយប៉ែត។ ចំណុចទី៤នៃអំពើពុករលួយរបស់លោក ខឹម ចិត្រា និងបក្ខពួកគឺជំរិតយកលុយក្នុងមួយខែ៣០០បាតពីអ្នករត់ម៉ូតូឌុបនៅគល់ស្ពានមិត្តភាពកម្ពុជា-ថៃ។
ទង្វើរបស់លោក ខឹម ចិត្រា មេនគរបាលអន្តោប្រវេសន៍ច្រកទ្វារអន្តរជាតិប៉ោយប៉ែត ដូចរៀបរាប់ខាងលើនេះគឹជាអំពើពុករលួយយ៉ាងច្បាស់ក្រឡែត ដូច្នេះថ្នាក់ដឹកនាំក្រសួងមហាផ្ទៃ និងនាយឧត្តមសេនីយ៍ នេត សាវឿន អគ្គស្នងការនគរបាលជាតិ មិនគួរបណ្ដែតបណ្ដោយតទៅទៀតនោះទេ។ ដោយសារថា អំពើពុករលួយច្រើនបែបច្រើនយ៉ាងរបស់លោក ខឹម ចិត្រា និងបក្ខពួកកំពុងប្រឈមនឹងការរិះគន់យ៉ាងខ្លាំងក្លាពីសំណាក់ពលរដ្ឋខ្មែរដែលធ្វើដំណើរចេញចូលទឹកដីសៀមតាមច្រកប៉ោយប៉ែត និងភ្ញៀវទេសចរចេញចូលតាមច្រកនេះ ៕
031 33 03 888