លោក ឱម យ៉ិនទៀង ប្រធានអង្គភាពប្រឆាំងអំពើពុករលួយគួរគួរបើកការស៊ើបអង្កេតឲស៊ីជម្រៅ លោក ណុប សំអានមេគយច្រកទំនប់រលកប្រព្រឹត្តអំពើពុករលួយ
ប្រភពពីមន្ត្រីគយនិងភ្នាក់ងារគយ ក្នុងខេត្តព្រះសីហនុ មួយចំនួនបានបង្ហើបឲ្យ ដឹងថា ក្រុមឈ្មួញនាំ ចូលទំនិញស្រប ច្បាប់ តាមច្រកទំនប់រលក កំពុងរង ការគាបសង្កត់ពីលោក ណុប សំអាន ប្រធានការិយាល័យគយ ច្រកទំនប់ រលក និង ពីសំណាក់លោក កែវ អង្កាម មន្ត្រីគយចល័តប្រចាំច្រកនេះកាន់តែខ្លាំងជាងមុន។ ប៉ុន្តែលោក ណុប សំអាន និងលោក កែវ អង្កាម បានឃុបឃិតឲ្យឈ្មួញធំៗនាំចូលទំនិញគេចពន្ធ ទំនិញបង់ពន្ធមិនគ្រប់ ទំនិញខុសច្បាប់ និងប្រេងសាំងគេចពន្ធតាមច្រកទំនប់រលកយ៉ាងពេញបន្ទុក ។ ការដែលលោក ណុប សំអាន ហ៊ានធ្វើអ្វីៗតាមអំពើចិត្តគឺដោយសារមានការសម្របសម្រួលពីមេគយធំៗនៅក្នុងខេត្តព្រះសីហនុផងដែរទើបអ្វីៗអាចប្រព្រឹត្តទៅដោយរលូនគ្មានឧបសគ្គ។ ក្រុមឈ្មួញដែលសម្រុកនាំចូលទំនិញគេចពន្ធ ទំនិញបង់ពន្ធមិនគ្រប់តាមច្រកទំនប់រលក មានដូចជាឈ្មួញឈ្មោះ ធី ឈ្មួញឈ្មោះ យាយវី ឈ្មួញឈ្មោះ ចែរ៉ា ឈ្មួញឈ្មោះ ណុប ឈ្មួញឈ្មោះ កូ ឈ្មួញឈ្មោះ សុខុម និងឈ្មួញឈ្មោះ ហួត ជាដើម។
ប្រភពពីឈ្មួញនិងអាជីវករមួយចំនួនដែលរកស៊ីនាំចូលទំនិញតាមច្រកទំនប់រលក ក្រុងព្រះសីហនុ បានឲ្យដឹងថាមួយរយៈចុងក្រោយនេះលោក ណុប សំអាន ប្រធានការិយាល័យគយច្រកទំនប់រលក និងលោក កែវ អង្កាម មន្ត្រីគយចល័តប្រចាំច្រកនេះប្រើអំណាចគាបយកលុយពីពួកគេកាន់តែច្រើនឡើងៗ។ ចំណែកលោក អូន ព័ន្ធមុនីរ័ត្ន ដែលជារដ្ឋមន្ត្រីក្រសួងសេដ្ឋកិច្ចនិងហិរញ្ញវត្ថុ ក៏ដូចជាលោក គុណ ញឹម អគ្គនាយកនៃអគ្គនាយកដ្ឋានគយនិងរដ្ឋាករកម្ពុជា បានរក្សាភាពស្ងៀមស្ងាត់ទុកឲ្យលោក ណុប សំអាន និងបក្ខពួកប្រព្រឹត្តអំពើពុករលួយតាមច្រើនរូបភាពដោយគ្មានខ្លាចក្រែងអ្វីឡើយ។
មន្ត្រីគយនៅខេត្តព្រះសីហនុ ដែលស្និទ្ធនឹងលោក ណុប សំអាន ប្រធានការិយាល័យគយច្រកផែទំនប់រលក បានឲ្យដឹងថាលោក ណុប សំអាន អាងមានខ្នងបង្អែករឹងមាំនៅក្នុងអគ្គនាយកដ្ឋានគយនិងរដ្ឋាករកម្ពុជា ទើបហ៊ានប្រព្រឹត្តអំពើពុករលួយ។ ក្នុងនោះករណីលោក ណុប សំអាន រាប់ក្បាលរថយន្តដឹកទំនិញចេញពីផែទំនប់រលក យកលុយដាក់ហោប៉ៅរបស់ខ្លួន គឺជាអំពើពុករលួយយ៉ាងច្បាស់ក្រឡែតព្រោះឈ្មួញបានបង់ពន្ធទំនិញនាំចូលរួចទៅហើយ។ ប្រភពបានឲ្យដឹងទៀតថាលោក ណុប សំអាន ចំណាយដើមទុនយ៉ាងច្រើនក្នុងការទទួលបានតំណែងជាប្រធានការិយាល័យគយច្រកកំពង់ផែទំនប់រលក ទើបខំប្រឹងប្រព្រឹត្តអំពើពុករលួយប្រមូលលុយស្រង់ដើមដោយគ្មានញញើតអ្វីទាំងអស់។
ប្រភពពីសមត្ថកិច្ចពាក់ព័ន្ធនៅខេត្តព្រះសីហនុ បានឲ្យដឹងថា មួយរយៈពេលចុងក្រោយនេះលោក ណុប សំអាន ប្រធានការិយាល័យគយច្រកទំនប់រលក និងលោក កែវ អង្កាម មន្ត្រីគយចល័តច្រកទំនប់រលក ឃុបឃិតគ្នាប្រព្រឹត្តអំពើពុករលួយកាន់តែខ្លាំងឡើងៗ។ ជាក់ស្ដែងក្រៅពីឃុបឃិតឲ្យឈ្មួញធំៗនាំចូលទំនិញគេចពន្ធ ទំនិញខុសច្បាប់ និងទំនិញបង់ពន្ធមិនគ្រប់ធ្វើឲ្យរដ្ឋខាតបង់ចំណូលពន្ធយ៉ាងច្រើនសន្ធឹកសន្ធាប់ក្នុងមួយខែៗ គឺលោក ណុប សំអាន ប្រើអំណាចគាបយកលុយពីឈ្មួញនិងអាជីវករតូចតាចស្រេចតែអំពើចិត្ត។
031 33 03 888