ឯកឧត្តមខៀវ កាញ៉ារិទ្ធ រដ្ឋមន្រ្តីក្រសួងព័ត៌មានបានអះអាងថាអ្នកសុំទានក៏ទទួលបានសេវាព្យាបាលដោយមិនគិតថ្លៃពីរាជរដ្ឋាភិបាល ដូចជាមន្ត្រីរាជការ និងកងកម្លាំងប្រដាប់អាវុធនោះដែរ

ឯកឧត្តមខៀវ កាញ៉ារិទ្ធ រដ្ឋមន្រ្តីក្រសួងព័ត៌មានបានអះអាងថាអ្នកសុំទានក៏ទទួលបានសេវាព្យាបាលដោយមិនគិតថ្លៃពីរាជរដ្ឋាភិបាល ដូចជាមន្ត្រីរាជការ និងកងកម្លាំងប្រដាប់អាវុធនោះដែរ។ថ្លែងក្នុងពិធីអបអរសារទ ខួបលើកទី១០៨ ទិវាអន្ដជាតិនារី ៨មីនា របស់ក្រសួងព័ត៌មាន នៅថ្ងៃទី២៨ ខែមីនា នាភោជនីយដ្ឋានទន្លេបាសាក់២ ឯកឧត្តមខៀវកាញារីទ្ធរដ្ឋមន្ត្រីក្រសួងព័ត៌មានបានបញ្ជាក់ថារាជរដ្ឋាភិបាលមិនត្រឹមតែគិតគូរចំពោះសុខភាពកម្មករ កម្មការិនីនៅតាមរោងចក្រ និងមន្ត្រីរាជការសាធារណៈប៉ុណ្ណោះទេ គឺថែមទាំងគិតគូរដល់ប្រជាជនក្រីក្រក៏ដូចជាអ្នកសុំទានផងដែរដោយពួកគាត់អាចចូលទៅព្យាបាលជំងឺនៅមន្ទីរពេទ្យរដ្ឋ និងឯកជនមួយចំនួនដោយមិនគិតថ្លៃ តាមរយៈបង្ហាញប័ណ្ណសមធម៌ ដូចនឹងប័ណ្ណបេឡាជាតិរបបសន្តិសុខសង្គម ហៅកាត់ថា ប.ស.ស ដែលចេញឲ្យមន្ត្រីរាជការ កងកម្លាំងប្រដាប់អាវុធ និងកម្មករ កម្មការិនី តាមបណ្តារោងចក្រសហគ្រាសផងដែរ។ឯកឧត្តមរដ្ឋមន្ត្រី មានប្រសាសន៍ថា ប្រមុខរាជរដ្ឋាភិបាលកម្ពុជា បានខិតខំប្រឹងប្រែងបង្កើតភ្នាក់ងារ ប.ស.ស ឡើង សម្រាប់ជួយដល់មន្ត្រីរាជការ កងកម្លាំងប្រដាប់អាវុធ និងកម្មករ កម្មការិនី តាមបណ្តារោងចក្រសហគ្រាសទាំងអស់ ឲ្យទទួលបានសេវាថែទាំសុខភាព និងព្យាបាលជំងឺនៅតាមមន្ទីរពេទ្យរដ្ឋ និងឯកជនមួយចំនួន ដែលសហការជាមួយ ប.ស.ស ដោយមិនអស់ថ្លៃចំណាយផ្ទាល់ខ្លួននោះឡើយដោយរាល់ការចំណាយជាបន្ទុករបស់រាជរដ្ឋាភិបាលទាំងស្រុង។ឯកឧត្តមបានបញ្ជាក់ថា រយៈពេល៤០ឆ្នាំមកនេះ រាជរដ្ឋាភិបាលកម្ពុជាបានយកចិត្តទុកដាក់ និងគិតគូរពីមន្រ្តីរាជការ កម្មករនិយោជិត ព្រមទាំងបានបង្កើតឲ្យមាន ភ្នាក់ងារ ប.ស.ស នៅឆ្នាំ២០០៨មក ដើម្បីផ្តល់ភាពងាយស្រួល ដល់មន្រ្តីរាជការ និងកម្មករទៅទទួលសេវាថែទាំសុខភាព និងព្យាបាលជំងឺនៅតាមមន្ទីរពេទ្យរដ្ឋ និងឯកជន មួយចំនួនដែលជាដៃគូ៕