កំពង់ចាម៖ ចាំមើល ឯកឧត្តមនាយឧត្តមសេនីយ៍ សៅ សុខា មេបញ្ជាការកងរាជអាវុធហត្ថលើផ្ទៃប្រទេស នឹងមានចំណាត់ការយ៉ាងណាដែរចំពោះ កូនចៅរបស់ខ្លួន ជាមន្ត្រីកងរាជអាវុធហត្ថ ឈ្មោះ សាន្ដ សុខុម ដែលគេស្គាល់ថា ជាកូនប្រុសរបស់ លោក សាន្តប៊ុនថាន មេបញ្ជាការកងរាជអាវុធហត្ថខេត្តក្រចេះ
ឈ្មោះ សាន សុខុម ត្រូវបានគេទម្លាយវីដេអូ នៃការវាយ និងដកកាំភ្លើងភ្ជង់គូរ ជម្លោះនៅក្នុងហាងអ៉ីនធើណេតមួយកន្លែង នៅទីរួមខេត្តកំពង់ចាម កាលពីថ្ងៃទី១៨ ខែមីនា ឆ្នាំ២០១៩ នាំឲ្យកក្រើកពេញបណ្តាញសង្គម Facebook ដល់ថ្ងៃ២៣ មីនានេះ ទើបជនរងគ្រោះហ៊ានចេញមុខប្តឹង។
ម្ចាស់ Account Facebook ក៏បានអំពាវនាវដល់នាយឧត្តមសេនីយ៍ សៅ សុខា មេបញ្ជាការអាវុធហត្ថលើផ្ទៃប្រទេស និងលោក គួច ចំរើន អភិបាលខេត្តកំពង់ចាម ជួយចាត់ការរឿងនេះដូច្នេះថា «ខ្ញុំបាទសូមគោរព ឯកឧត្តម នាយឧត្តមសេនីយ៍ សៅ សុខា និងឯកឧត្តម គួច ចំរើន អភិបាលខេត្ត កំពង់ចាម ។ នេះជាវិដេអូដែលកូនប្រុសមេប៉េអឹមខេត្ត ក្រចេះ ឈ្មោះ សាន សុខុម (អ.ហ សក្ក័៤) បានដកកាំភ្លើងភ្ជង់គំរាម និងបានវ៉ៃមិត្តភក្តិរបស់ខ្ញុំនៅកន្លែងអ៊ីនធឺណែតមួយនៅក្នុងទីរួមខេត្ត កំពង់ចាម អាស្រ័យដូចដែរបានរៀបរាប់ខាងលើ សូមឯកឧត្តម ប្រើកន្តាប់ដៃដែកបំបែកអាវុធហត្ថម្នាក់នេះផង។ បញ្ជាក់អានេះអាងឪវាធ្វើធំ ដើរវ៉ៃគេច្រើនណាស់»។
មន្រ្តីអាវុធហត្ថម្នាក់នៅខេត្តក្រចេះ បានបង្ហើបឲ្យដឹងថា លោក សាន សុខុម ពិតជាកូនប្រុសមេបញ្ជាការអាវុធហត្ថខេត្តពិតមែន តែសម្រាប់តួនាទីវិញហាក់មិនទាន់ច្បាស់ទេ ព្រោះតែបានទៅរស់នៅជាមួយប្រពន្ធនៅខេតកំពង់ចាម និងយូរៗ ម្តងមកខេត្តក្រចេះ។
ជុំវិញការបង្ហាះវិដេអូនេះ លោក សាន សុខុម ដែលត្រូវគេចោទប្រកាន់នោះ បានទូរស័ព្ទប្រាប់អង្គភាពព័ត៌មាន ដោយបដិសេធថា មិនមានរឿងយ៉ាងដូច្នោះឡើយ តែនៅពេលសួរថា តើមិនមែនជាការពិតយ៉ាងដូចម្តេច បើឃើញស្រាប់នៅក្នុងសកម្មភាពវីដេអូនោះ? លោក សាន សុខុម ក៏ផ្តាច់ទំនាក់ទំនងតែម្តង។
សូមបញ្ជាក់ថា ក្រោយការអំពាវនាវរបស់អភិបាលខេត្តកំពង់ចាមឲ្យជនរងគ្រោះដាក់ពាក្យបណ្តឹង ទើប នៅថ្ងៃទី២៣ ខែមីនា ឆ្នាំ២០១៩នេះ មានជនរងគ្រោះ ២នាក់ គឺឈ្មោះ វ៉ាន់ ចាន់អទិច្ចបញ្ញា និង ឈ្មោះ យ៉េ ចិន្តា បានមកដាក់ពាក្យបណ្តឹងនៅស្នងការនគបាលខេត្តកំពង់ចាម ទើប ថ្ងៃទី២៤ ខែមីនា នេះ លោក ហាក់ ហ៊ាន់ តំណាងអយ្យការតុលាការខេត្តកំពង់ចាម ចេញដីកាបញ្ជាអោយលោក សាន្ត សុខុម ចូលខ្លួនមកអយ្យការអមសាលាដំបូងខេត្តកំពង់ចាម ពីបទហិង្សាដោយចេតនាមានស្ថានទម្ងន់ទោសដោយគំរាមកំហែងនឹងអាវុធ។
ប្រភពពីអ្នកជិតខាងលោក សានសុខុម ថា លោកបានរត់គេចមិននៅផ្ទះទៀតទេ ប្រហែលរត់ទៅពួននៅខេត្តក្រចេះទឹកដីដ៏មានអំណាចរបស់ឪហើយ។ មហាជនរង់ចាំមើលថា តើ កូនប្រុសមេប៉េអឹមខេត្តក្រចេះរូបនេះ នឹងគេចរួចសំណាញ់ច្បាប់ដែរឬយ៉ាងណា????