ប្រភពដែលស្និទ្ធនឹងលោក វ៉ូ វណ្ណា ប្រធានសាខាគយខេត្តកណ្ដាល បានឲ្យដឹងថា បច្ចុប្បន្នឈ្មួញធំៗដែល ដឹកជញ្ជូនទំនិញគេចពន្ធ ទំនិញបង់ពន្ធ មិនគ្រប់ ឬទំនិញខុសច្បាប់ ឆ្លងកាត់ខេត្តកណ្ដាល ចូលមករាជធានីភ្នំពេញ សុទ្ធតែមានទំនាក់ទំនង ជិតស្និទ្ធជាមួយលោក វ៉ូ វណ្ណា ទាំងអស់។ ប្រសិនបើឈ្មួញណាគ្មានទំនាក់ទំនងជិតស្និទ្ធជាមួយលោក វ៉ូ វណ្ណា ទេនោះគឺមិនអាចដឹកជញ្ជូនទំនិញគេចពន្ធ ទំនិញខុសច្បាប់ ឬទំនិញបង់ពន្ធមិនគ្រប់ ឆ្លងកាត់គ្រប់ច្រកផ្លូវក្នុងខេត្តកណ្ដាល ចូលមករាជធានីភ្នំពេញ បានឡើយ។ អំពើពុករលួយរបស់លោក វ៉ូ វណ្ណា មានសភាពកាន់តែខ្លាំងក្លាជាងមុនទៅទៀត ដូច្នេះលោក ឱម យ៉ិនទៀង ប្រធានអង្គភាពប្រឆាំងអំពើពុករលួយ មិនគួរបណ្ដែតបណ្ដោយតទៅទៀតទេ ព្រោះរឿងអាស្រូវពុករលួយរបស់លោក វ៉ូ វណ្ណា ត្រូវបានលាតត្រដាងជាបន្តបន្ទាប់រួចមកហើយ។
ថ្មីៗនេះមន្ត្រីគយនិងភ្នាក់ងារគយខេត្តកណ្ដាល មួយចំនួនបានអំពាវនាវឲ្យលោកនាយករដ្ឋមន្ត្រី ហ៊ុន សែន និងលោក ឱម យ៉ិនទៀង ប្រធានអង្គភាពប្រឆាំងអំពើពុករលួយ ចាត់វិធានការទប់ស្កាត់អំពើពុករលួយតាមច្រើនរូបភាពរបស់លោក វ៉ូ វណ្ណា ប្រធានសាខាគយខេត្តកណ្ដាល ជាបន្ទាន់។ ដោយហេតុថា មួយរយៈចុងក្រោយនេះរឿងអាស្រូវពុករលួយរបស់លោក វ៉ូ វណ្ណា ត្រូវបានលាតត្រដាងជាបន្តបន្ទាប់ ប៉ុន្តែលោក អូន ព័ន្ធមុនីរ័ត្ន ដែលជារដ្ឋមន្ត្រីក្រសួងសេដ្ឋកិច្ចនិងហិរញ្ញវត្ថុ ក៏ដូចជាមេគយធំៗក្នុងអគ្គនាយកដ្ឋានគយនិងរដ្ឋាករ មិនចាត់វិធានការទប់ស្កាត់អំពើពុករលួយរបស់លោក វ៉ូ វណ្ណា នោះឡើយ។
បញ្ហានេះកំពុងធ្វើឲ្យលោក វ៉ូ វណ្ណា មានអំណាចកាន់តែធំធេងក្នុងការប្រព្រឹត្តអំពើពុករលួយដោយគ្មានញញើតអ្វីទាំងអស់ ព្រោះអាងមានខ្នងបង្អែករឹងមាំនៅក្នុងអគ្គនាយកដ្ឋានគយនិងរដ្ឋាករកម្ពុជា។
ប្រភពពីមន្ត្រីគយក្នុងខេត្តកណ្ដាល មួយចំនួនបានបង្ហើបឲ្យដឹងថា ចាប់តាំងពីទទួលបានតំណែងជាប្រធានសាខាគយខេត្តកណ្ដាល រួចមកគឺលោក វ៉ូ វណ្ណា ប្រព្រឹត្តអំពើពុករលួយខ្លាំងជាងកាលនៅធ្វើជាប្រធានការិយាល័យគយច្រកទ្វារអន្តរជាតិត្រពាំងផ្លុង ខេត្តត្បូងឃ្មុំ ទៅទៀត។ ប្រភពបានឲ្យដឹងទៀតថា បច្ចុប្បន្នទំនិញដែលឈ្មួញនាំចូលតាមច្រកក្អមសំណ និងច្រកផ្សេងៗទៀតក្នុងខេត្តកណ្ដាល ភាគច្រើនជាទំនិញគេចពន្ធឬទំនិញបង់ពន្ធមិនគ្រប់ គឺឈ្មួញបង់ពន្ធចូលរដ្ឋត្រឹម២៥ទៅ៣០ភាគរយប៉ុណ្ណោះ។
ក្រៅពីនេះគឺមន្ត្រីគយប្រចាំច្រកព្រំដែនបានឃុបឃិតបែងចែកផលប្រយោជន៍លើតុក្រោមតុជាមួយឈ្មួញព្រោះមានការសម្របសម្រួលពីសំណាក់លោក វ៉ូ វណ្ណា យ៉ាងរលូនតែម្តង។
ប្រភពពីក្រុមឈ្មួញនិងអាជីវករដែលដឹកជញ្ជូនទំនិញចូលរាជធានីភ្នំពេញ តាមច្រកផ្លូវជាតិជាច្រើនខ្សែដូចជា ផ្លូវជាតិលេខ១ លេខ២ លេខ៣ លេខ៤ លេខ៥ លេខ៦ និងផ្លូវជាតិផ្សេងៗទៀតបានឲ្យដឹងថា មន្ត្រីគយចល័តខេត្តកណ្ដាល ក្រោមការគ្រប់គ្រងរបស់លោក វ៉ូ វណ្ណា គាបយកលុយពីពួកគេកាន់តែច្រើនឡើងៗ។
ក្រុមឈ្មួញបានបញ្ជាក់ថា ទោះបីពួកគេបង់ពន្ធគយនៅច្រកព្រំដែនរួចហើយក៏ដោយ ក៏ចៀសមិនផុតពីបង់លុយលើតុក្រោមតុ ថ្លៃបាយថ្លៃទឹក ឲ្យមន្ត្រីគយចល័តខេត្តកណ្ដាល តាមការកំណត់នោះទេ។ ឈ្មួញមួយចំនួនបានត្អូញត្អែរថា អាជីវកម្មរបស់ពួកគេទទួលបានផលចំណេញកាន់តែតិចទៅៗ ព្រោះមន្ត្រីគយចល័តខេត្តកណ្ដាល គាបយកលុយតាមរបៀបពុករលួយកាន់តែច្រើនឡើងៗ។
031 33 03 888