ប្រភពពីមន្ត្រីនៅច្រកជប់គគីរ និងច្រកអូរស្មាច់ ក៏ដូចជាច្រកជាំស្រងាំ បានឲ្យដឹងថា ទំនិញដែលឈ្មួញធំៗ នាំចូលតាមច្រកទាំង៣ នេះបង់ ពន្ធជូនរដ្ឋត្រឹម៣៥ទៅ៤០ ភាគរយប៉ុណ្ណោះ ក្រៅពីនេះគឺមានការ ឃុបឃិតបែងចែកផលប្រយោជន៍ជា មួយមន្ត្រីគយពុករលួយ ក្រោមការគ្រប់ គ្រងរបស់លោក យូ ហេង យ៉ាងសុខស្រួល។
ទន្ទឹមនឹងនេះ មន្ត្រីគយនៅច្រកអូរស្មាច់ ច្រកជប់គ គីរ និងច្រកជាំស្រងាំ បែរជាគាបសង្កត់ទៅលើឈ្មួញនិងអាជីវករតូចតាចដែលនាំចូលទំនិញស្របច្បាប់យ៉ាងគឃ្លើនមិនខ្វល់ពីការរិះគន់អ្វីឡើយ។
ជាងនេះទៅទៀតក្រុមគយចល័តក្នុងខេត្តឧត្ដរមានជ័យ មិនហ៊ានប៉ះពាល់ឈ្មួញធំៗដែលនាំចូលទំនិញគេចពន្ធ ទំនិញខុសច្បាប់និងទំនិញបង់ពន្ធមិនគ្រប់នោះទេ គឺពួកគេគាបសង្កត់បានតែឈ្មួញនិងអាជីវករតូចតាចដែលនាំចូលទំនិញបង់ពន្ធជូនរដ្ឋត្រឹមត្រូវនិងច្រកព្រំដែន។
បញ្ហានេះគឺជារឿងដែលលោក អូន ព័ន្ធមុនីរ័ត្ន រដ្ឋមន្ត្រីក្រសួងសេដ្ឋកិច្ចនិងហិរញ្ញវត្ថុ មិនគួរបណ្ដែតបណ្ដោយតទៅទៀតទេ ព្រោះបច្ចុប្បន្នលោក យូ ហេង និងបក្ខពួកឃុបឃិតគ្នាប្រព្រឹត្តអំពើពុករលួយកាន់តែច្រើន ហើយយកឈ្មោះលោក គុណ ញឹម ដែលជាអគ្គនាយកគយទៅបិទបាំងសកម្មភាពនៃអំពើពុករលួយរបស់ពួកគេ។
កន្លងមករឿងអាស្រូវពុករលួយរបស់លោក យូ ហេង ប្រធានសាខាគយខេត្តបន្ទាយមានជ័យ ត្រូវបានលាតត្រដាងជាបន្តបន្ទាប់ ជាពិសេសទាក់ទងទៅនឹងការឃុបឃិតបើកដៃឲ្យឈ្មួញនាំចូលទំនិញគេចពន្ធ ទំនិញបង់ពន្ធមិនគ្រប់ និងទំនិញខុសច្បាប់កាន់តែច្រើនឡើងៗតាមច្រកអូរស្មាច់ ច្រកជាំស្រងាំ និងច្រកជប់គគីរ។
តាមប្រភពពីមន្ត្រីនិងភ្នាក់ងារគយមួយចំនួនក្នុងខេត្តឧត្ដរមានជ័យ បានឲ្យដឹងថា ការដែលលោក គួន សុភាព មេគយច្រកអូរស្មាច់ ហ៊ានបើកដៃឲ្យឈ្មួញនាំចូលទំនិញគេចពន្ធ ទំនិញបង់ពន្ធមិនគ្រប់ និងទំនិញខុសច្បាប់យ៉ាងរាលដាល គឺមានការឃុបឃិបបើកដៃពីសំណាក់លោក យូ ហេង ប្រធានសាខាគយខេត្តឧត្ដរមានជ័យ ផងដែរ។ ប្រសិនបើគ្មានការឃុបឃិតបើកដៃពីសំណាក់លោក យូ ហេង ទេនោះគឺលោក គួន សុភាព មេគយច្រកអូរស្មាច់ មិនហ៊ានធ្វើអ្វីៗស្រេចតែអំពើចិត្តរបស់ខ្លួនឡើយ។
ប្រភពដែលស្និទ្ធនឹងលោក យូ ហេង បានឲ្យដឹងថា ប្រធានការិយាល័យគយនៅច្រកជប់គគីរ និងច្រកជាំស្រងាំ ក៏ត្រូវលោក យូ ហេង បើកដៃឲ្យធ្វើអ្វីៗតាមអំពើចិត្តផងដែរ ហើយមានការបែងចែកផលប្រយោជន៍យ៉ាងរលូនតែម្តង។
ប្រភពបានឲ្យដឹងទៀតថា ប្រេងសាំងគេចពន្ធនិងទំនិញគេចពន្ធជាច្រើនប្រភេទត្រូវឈ្មួញនាំចូលយ៉ាងពេញបន្ទុកតាមច្រកអូរស្មាច់ ច្រកជប់គគីរ និងច្រកជាំស្រងាំ ហើយក្រុមគយចល័តក្នុងខេត្តឧត្ដរមានជ័យ ប្រើអំណាចគាបយកលុយពីក្រុមឈ្មួញនិងអាជីវករដឹកជញ្ជូនទំនិញតាមអំពើចិត្តរបស់ពួកគេ។ រហូតមកដល់ពេលនេះទាំងលោក អូន ព័ន្ធមុនីរ័ត្ន ដែលជារដ្ឋមន្ត្រីក្រសួងសេដ្ឋកិច្ចនិងហិរញ្ញវត្ថុ ក៏ដូចជាលោក គុណ ញឹម អគ្គនាយកគយ កំពុងបណ្ដោយឲ្យលោក យូ ហេង ប្រធានសាខាគយខេត្តឧត្ដរមានជ័យ និងបក្ខពួកធ្វើអ្វីៗតាមអំពើចិត្ត ៕
031 33 03 888