ថ្មីៗកន្លងទៅនេះរឿងអាស្រូវ ពុករលួយរបស់លោក សំ កុសល ប្រធានសាខាគយខេត្តកោះ កុង ត្រូវបានបើកក កាយ ជាបន្តបន្ទាប់ក៏ប៉ុន្តែ លោក គុណ ញឹម អគ្គនាយក នៃអគ្គនាយកដ្ឋានគយ និងរដ្ឋាករកម្ពុជា ក៏ដូចជា លោក អូន ព័ន្ធ មុនីរ័ត្ន រដ្ឋមន្ត្រីក្រសួង សេដ្ឋកិច្ចនិងហិរញ្ញវត្ថុ បែរជាសម្ងំស្ងៀមធ្វើមិនដឹងមិន ឮអ្វីទាំងអស់។ ហេតុនេះហើ យទើប លោក សំ កុសល កាន់តែបានដៃក្នុងការឃុបឃិត ឲ្យឈ្មួញនាំចូលទំនិញ គេចពន្ធ ទំនិញបង់ពន្ធ មិនគ្រប់ និងទំនិញ ខុសច្បាប់កាន់តែច្រើនឡើងៗធ្វើឲ្យរដ្ឋត្រូវខាតបង់ចំណូលពន្ធយ៉ាងច្រើនសន្ធឹកសន្ធាប់ក្នុងមួយខែៗ។ សូម្បីតែលោក ឱម យ៉ិនទៀង ប្រធានអង្គភាពប្រឆាំងអំពើពុករលួយ ក៏រក្សាភាពស្ងៀមស្ងាត់ដែរក្នុងខណៈដែលលោក សំ កុសល ប្រធានសាខាគយខេត្តកោះកុង ប្រើតួនាទីនិងអំណាចប្រមូលលុយតាមរបៀបពុករលួយ។
ប្រភពពីមន្ត្រីគយមួយចំនួននៅក្នុងអគ្គនាយកដ្ឋាននិងរដ្ឋាករកម្ពុជា បានឲ្យដឹងថា ការដែលលោក សំ កុសល ប្រធានសាខាគយខេត្តកោះកុង ហ៊ានប្រើអំណាចប្រព្រឹត្តអំពើពុករលួយ ច្រើនបែបច្រើនសណ្ឋាន គឺមានការឃុបឃិតបើកដៃពីសំណាក់មេគយធំៗនៅក្នុងអគ្គនាយកដ្ឋានគយនិងរដ្ឋាករកម្ពុជាផងដែរ។
ជាក់ស្ដែងក្នុងខណៈដែលអំពើពុករលួយរបស់លោក សំ កុសល ត្រូវបានបើកកកាយជាបន្តបន្ទាប់គឺលោក គុណ ញឹម ដែលជាអគ្គនាយគយ បែរជារក្សាភាពស្ងៀមស្ងាត់ធ្វើមិនដឹងមិនឮអ្វីទាំងអស់ ហើយសូម្បីតែលោក ឱម យ៉ិនទៀង ប្រធានអង្គភាពប្រឆាំងអំពើពុករលួយ ក៏មិនទាន់បើកការស៊ើបអង្កេតឲ្យបានស៊ីជម្រៅទៅលើរឿងអាស្រូវពុករលួយរបស់លោក សំ កុសល ដែលជាមេគយខេត្តកោះកុង នោះដែរ។ ហេតុនេះហើយទើបលោក សំ កុសល នៅតែឃុបឃិតបើកដៃឲ្យឈ្មួញនាំចូលទំនិញគេចពន្ធ ទំនិញបង់ពន្ធមិនគ្រប់និងទំនិញខុសច្បាប់យ៉ាងពេញបន្ទុកដើម្បីជាថ្នូរនឹងផលប្រយោជន៍ដោយគ្មានញញើតអ្វីទាំងអស់។
ប្រភពពីមន្ត្រីនិងភ្នាក់ងារគយមួយចំនួនក្នុងខេត្តកោះកុង បានឲ្យដឹងថា គ្រប់ច្រកព្រំដែនក្នុងខេត្តកោះកុង ទាំងផ្លូវទឹកនិងផ្លូវគោក គឺមានឈ្មួញនាំចូលទំនិញគេចពន្ធ ទំនិញបង់ពន្ធមិនគ្រប់ និងទំនិញខុសច្បាប់យ៉ាងពេញបន្ទុកតែម្តង ព្រោះមានការឃុបឃិតបើកដៃពីសំណាក់លោក សំ កុសល ដែលកំពុងសប្បាយប្រព្រឹត្តអំពើពុករលួយ។
ឈ្មួញមួយចំនួនអាចនាំចូលម៉ូតូទំនើបៗគេចពន្ធនិងរថយន្តទំនើបៗយ៉ាងរលូនព្រោះពួកគេមានលោក សំ កុសល ជាខ្នងបង្អែកយ៉ាងរឹងមាំចាំជួយការពារនិងជួយដោះស្រាយគ្រប់ពេលវេលា។ សូម្បីតែទំនិញជាប្រភេទចំណីអាហារខូចគុណភាពមានលាយសារធាតុគីមីនិងទំនិញផុតកាលកំណត់ប្រើប្រាស់ក៏ត្រូវលោក សំ កុសល ប្រធានសាខាគយខេត្តកោះកុង ឃុបឃិតជាមួយមន្ត្រីកាំកុងត្រូលបណ្ដោយឲ្យឈ្មួញនាំចូលយ៉ាងអនាធិបតេយ្យដែរ។
ប្រភពដែលស្និទ្ធនឹងលោក សំ កុសល ប្រធានសាខាគយខេត្តកោះកុង បានបង្ហើបឲ្យដឹងថាលោក សំ កុសល មានខ្នងបង្អែកធំជាងលោក គុណ ញឹម ដែលជាអគ្គនាយកគយទៅទៀត ហេតុនេះហើយទើបលោក សំ កុសល ហ៊ានឃុបឃិតឲ្យឈ្មួញនាំចូលទំនិញគេចពន្ធ ទំនិញខុសច្បាប់ និងទំនិញបង់ពន្ធមិនគ្រប់ ដើម្បីជាថ្នូរនឹងផលប្រយោជន៍។
ប្រភពបានឲ្យដឹងទៀតថា បច្ចុប្បន្នទំនិញដែលឈ្មួញនាំចូលតាមច្រកព្រំដែនផ្លូវទឹក ផ្លូវគោក ក្នុងខេត្តកោះកុង គឺឈ្មួញបង់ពន្ធត្រឹមតែ២៥ទៅ៣០ភាគរយប៉ុណ្ណោះ ក្រៅពីនេះគឺមានការបែងចែកផលប្រយោជន៍ជាមួយលោក សំ កុសល ប្រធានសាខាគយខេត្តកោះកុង យ៉ាងសុខស្រួល។ លើសនេះទៅទៀតលោក សំ កុសល បានឃុបឃិតឲ្យឈ្មួញមួយចំនួនបង់ពន្ធតាមរបៀងម៉ៅការដែលផ្ទុយទៅបទបញ្ញត្តិរបស់អគ្គនាយកដ្ឋានគយនិងរដ្ឋាករកម្ពុជាទៀតផង ដែលជាការបំផ្លាញចំណូលពន្ធរដ្ឋតាមអំពើចិត្ត។ ដូច្នេះលោក អូន ព័ន្ធមុនីរ័ត្ន រដ្ឋមន្ត្រីក្រសួងសេដ្ឋកិច្ចនិងហិរញ្ញវត្ថុ មិនគួរមើលរំលងតទៅទៀតទេ ព្រោះបច្ចុប្បន្នលោក សំ កុសល និងបក្ខពួកកំពុងឃុបឃិតគ្នាប្រព្រឹត្តអំពើពុករលួយតាមអំពើចិត្ត ៕
031 33 03 888