តាមប្រភពពីមន្ត្រីគយនិងភ្នាក់ងារ គយក្នុងខេត្តបាត់ដំបង បានបង្ហើបឲ្យដឹងទៀតថា មួយរយៈពេលចុងក្រោយនេះលោក អ៊ុំ ចាន់រតនា ប្រធាន ការិយាល័យគយច្រកទ្វារអន្តរជាតិដូង និងមន្ត្រីក្រោមឱវាទកំពុងឃុបឃិតគ្នា ប្រព្រឹត្តអំពើពុករលួយកាន់តែខ្លាំង ឡើងៗដោយគ្មានញញើត អ្វីទាំងអស់។ អំពើពុករលួយរបស់លោក អ៊ុំ ចាន់រតនា និងបក្ខពួកធ្វើឲ្យរ ដ្ឋត្រូវខាតបង់ចំណូលពន្ធយ៉ាងច្រើនសន្ធឹកសន្ធាប់ក្នុងមួយខែៗ ហើយធ្វើឲ្យប៉ះពាល់យ៉ាងខ្លាំងដល់វិធានការកែទម្រង់ស៊ីជម្រៅនៅក្នុងស្ថាប័នគយទៀតផង។ ដូច្នេះហើយទើបមានការអំពាវនាវឲ្យលោក អូន ព័ន្ធមុនីរ័ត្ន រដ្ឋមន្ត្រីក្រសួងហិរញ្ញវត្ថុ ក៏ដូចជាលោក ឱម យ៉ិនទៀង ប្រធានអង្គភាពប្រឆាំងអំពើពុករលួយ ចាត់វិធានការទប់ស្កាត់អំពើពុករលួយរបស់លោក អ៊ុំ ចាន់រតនា និងបក្ខពួកជាបន្ទាន់ដើម្បីកុំឲ្យពួកគេធ្វើអ្វីៗស្រេចតែអំពើចិត្តបន្តទៀត។
ក្នុងនោះអង្គភាពប្រឆាំងអំពើពុករលួយ គួរបើកការស៊ើបអង្កេតឲ្យបានស៊ីជម្រៅទៅលើរឿងអាស្រូវរបស់លោក អ៊ុំ ចាន់រតនា ផងដែរដើម្បីកុំឲ្យមន្ត្រីគយរូបនេះប្រើតួនាទីនិងអំណាចប្រព្រឹត្តអំពើពុករលួយបំផ្លាញចំណូលពន្ធរដ្ឋយ៉ាងកំរោលដូចសព្វថ្ងៃនេះទៀត។
តាមប្រភពពីមន្ត្រីគយនិងភ្នាក់ងារគយមួយចំនួននៅក្នុងខេត្តបាត់ដំបង បានឲ្យដឹងថាលោក អ៊ុំ ចាន់រតនា ប្រធានការិយាល័យគយច្រកទ្វារអន្តរជាតិដូង ដែលអាងមានខ្នងបង្អែករឹងមាំនៅក្នុងអគ្គនាយកដ្ឋានគយនិងរដ្ឋាករកម្ពុជា កំពុងប្រើអំណាចប្រព្រឹត្តអំពើពុករលួយតាមច្រើនរូបភាពដោយគ្មានញញើតអ្វីទាំងអស់។ អំពើពុករលួយរបស់លោក អ៊ុំ ចាន់រតនា ត្រូវបានលាតត្រដាងជាបន្តបន្ទាប់ក៏ប៉ុន្តែរហូតមកដល់ពេលនេះលោក គុណ ញឹម ដែលជាមេគយធំមិនចាត់វិធានការទប់ស្កាត់អំពើពុករលួយរបស់លោក អ៊ុំ ចាន់រតនា នោះទេហើយបណ្ដោយឲ្យមន្ត្រីគយរូបនេះធ្វើអ្វីៗតាមអំពើចិត្ត។
ទោះជាយ៉ាងណារឿងអាស្រូវពុករលួយរបស់លោក អ៊ុំ ចាន់រតនា គឺជារឿងដែលមិនអាចបិទបាំងបានឡើយ ហើយក៏មានការអំពាវនាវឲ្យលោក ឱម យ៉ិនទៀង ប្រធានអង្គភាពប្រឆាំងអំពើពុករលួយ បើកការស៊ើបអង្កេតឲ្យបានស៊ីជម្រៅទៅលើរឿងអាស្រូវពុករលួយរបស់លោក អ៊ុំ ចាន់រតនា ប្រធានការិយាល័យគយច្រកទ្វារអន្តរជាតិដូង ផងដែរ។
សេចក្ដីរាយការណ៍ពីមន្ត្រីបម្រើការងារនៅច្រកទ្វារអន្តរជាតិដូង ស្រុកកំរៀង ខេត្តបាត់ដំបង បានបង្ហើបឲ្យដឹងថា លោក អ៊ុំ ចាន់រតនា ប្រធានការិយាល័យគយច្រកទ្វារអន្តរជាតិដូង កំពុងប្រើតួនាទីនិងអំណាចប្រមូលលុយតាមរបៀបពុករលួយយ៉ាងក្រអឺតក្រទម។
មន្ត្រីនិងភ្នាក់ងារគយក្នុងខេត្តបាត់ដំបង មួយចំនួនបានលើកឡើងថា ការដែលលោក អ៊ុំ ចាន់រតនា ហ៊ានធ្វើអ្វីៗតាមអំពើចិត្តគឺមានការឃុបឃិតបើកដៃពីសំណាក់លោក គុណ ញឹម ដែលជាអគ្គនាយកនៃអគ្គនាយកដ្ឋានគយនិងរដ្ឋាករកម្ពុជាផងដែរ ទើបអ្វីៗអាចប្រព្រឹត្តទៅដោយរលូន។ ដូច្នេះលោក អូន ព័ន្ធមុនីរ័ត្ន ដែលជារដ្ឋមន្ត្រីក្រសួងសេដ្ឋកិច្ចនិងហិរញ្ញវត្ថុ មិនគួរមើលរំលងរឿងអាស្រូវពុករលួយរបស់លោក អ៊ុំ ចាន់រតនា ប្រធានការិយាល័យគយច្រកទ្វារអន្តរជាតិដូង នោះទេហើយគួរចាត់វិធានការទប់ស្កាត់ប្រកបដោយប្រសិទ្ធភាពនិងទាន់ពេលវេលា។
តាមការអះអាងរបស់សមត្ថកិច្ចពាក់ព័ន្ធបានឲ្យដឹងថា បច្ចុប្បន្នលោក អ៊ុំ ចាន់រតនា ប្រធានការិយាល័យគយ ច្រកទ្វារអន្តរជាតិដូង បានឃុបឃិតឲ្យឈ្មួញធំៗនាំចូលទំនិញគេចពន្ធ ទំនិញបង់ពន្ធមិនគ្រប់ និងទំនិញខុសច្បាប់តាមច្រកនេះកាន់តែច្រើនឡើងៗដើម្បីជាថ្នូរនិងផលប្រយោជន៍។ ប្រភពបានឲ្យដឹងទៀតថា ទំនិញដែលឈ្មួញនាំចូលតាមច្រកទ្វារអន្តរជាតិដូង ភាគច្រើនគឺបង់ពន្ធត្រឹម៣០ទៅ៤០ភាគរយប៉ុណ្ណោះ ហើយក្រៅពីនេះគឺឈ្មួញបែងចែកផលប្រយោជន៍លើតុក្រោមតុជាមួយលោក អ៊ុំ ចាន់រតនា ជាការស្រេច។
ចំណែកអាជីវករនិងឈ្មួញតូចតាចដែលនាំចូលទំនិញស្របច្បាប់តាមច្រកទ្វារអន្តរជាតិដូង ត្រូវលោក អ៊ុំ ចាន់រតនា និងមន្ត្រីក្រោមឱវាទគាបយកលុយតាមអំពើចិត្តដោយមិនខ្វល់ពីការរិះគន់អ្វីទាំងអស់។ ជាងនេះទៅទៀតលោក អ៊ុំ ចាន់រតនា និងបក្ខពួកបានឃុបឃិតជាមួយឈ្មួញខិលខូចក្នុងការកែឯកសារបន្លំប្រភេទទំនិញយ៉ាងកំរោល ដែលបញ្ហានេះលោក អូន ព័ន្ធមុនីរ័ត្ន ដែលជារដ្ឋមន្ត្រីក្រសួងសេដ្ឋកិច្ចនិងហិរញ្ញវត្ថុ គួរចាត់វិធានការត្រួតពិនិត្យឡើងវិញខ្លះផង ៕
031 33 03 888