ថ្មីៗនេះឈ្មួញជាច្រើននាក់ សម្រុកកាប់ឈើនិងដឹកជញ្ជូនឈើចេញ ពីតំបន់ព្រៃឡង់ ស្រុកសណ្ដាន់ យ៉ាងគគ្រឹក គគ្រេ ងហើយមិនឃើញលោក ប៊ុន សុធី នាយខណ្ឌរដ្ឋបាលព្រៃឈើខេត្តកំពង់ធំ ចាត់វិធានការបង្ក្រាប តាមតួនាទីរបស់ខ្លួននោះទេ ។ ទន្ទឹមនឹងនេះមានក្រុមជនល្មើសកាប់ឈើ និងដឹកជញ្ជូនឈើចេញពីតំបន់ព្រៃអង់តែន ក្នុងស្រុកសន្ទុក ខេត្តកំពង់ធំ យ៉ាងរាលដាល ហើយលោក ប៊ុន សុធី និងមន្ត្រីរដ្ឋបាលព្រៃ ឈើប្រចាំស្រុកសន្ទុក នាំគ្នាសម្ងំ ស្ងៀម ធ្វើមិនដឹងមិនឮអ្វីទាំងអស់។ ប្រជាពលរដ្ឋបានរិះគន់ចំៗថា ក្រោយពេលលោក ប៊ុន សុធី ចូលកាន់តំណែងជានាយខណ្ឌរដ្ឋបាលព្រៃឈើខេត្តកំពង់ធំ គឺបទល្មើសកាប់ឈើនិងដឹកជញ្ជូនឈើនៅក្នុងស្រុកសណ្ដាន់ ស្រុកសន្ទុក ស្រុកបារាយណ៍ និងស្រុកប្រាសាទសំបូរ ពុំមានការថយចុះឡើយ ផ្ទុយទៅវិញបទល្មើសរាលដាលកាន់តែខ្លាំងលើសមុនទៅទៀត។
ប្រភពពីមន្ត្រីរាជការនៅក្នុងមន្ទីរកសិកម្មខេត្តកំពង់ធំ បានឲ្យដឹងថា បច្ចុប្បន្នលោក ប៊ុន សុធី នាយខណ្ឌរដ្ឋបាលព្រៃឈើខេត្តកំពង់ធំ ជំនួសលោក តឹប ញាតា ដែលត្រូវដកចេញនោះកំពុងប្រើតួនាទីនិងអំណាចប្រមូលលុយពីបទល្មើសព្រៃឈើយ៉ាងក្រអឺតក្រទម ហើយមិនចាត់វិធានការបង្ក្រាបបទល្មើសតាមតួនាទីរបស់ខ្លួននោះទេ។ ប្រភពបានឲ្យដឹងទៀតថាទំនងជាលោក ប៊ុន សុធី ចំណាយដើមទុនយ៉ាងច្រើនក្នុងការទទួលបានតំណែងជានាយខណ្ឌរដ្ឋបាលព្រៃឈើខេត្តកំពង់ធំ ខំប្រឹងប្រមូលលុយស្រង់ដើមដោយមិនខ្វល់ពីការរិះគន់អ្វីទាំងអស់។
ប្រការនេះហើយដែលធ្វើឲ្យបទល្មើសកាប់ឈើនិងដឹកជញ្ជូនឈើខុសច្បាប់ក្នុងខេត្តកំពង់ធំ ក៏ដូចជាបទល្មើសដឹកជញ្ជូនឈើពីខេត្តឧត្ដរមានជ័យ ខេត្តសៀមរាប ខេត្តព្រះវិហារ ឆ្លងកាត់ខេត្តកំពង់ធំ នៅតែកើតឡើងយ៉ាងពេញបន្ទុក។
សមត្ថកិច្ចពាក់ព័ន្ធនៅក្នុងខេត្តកំពង់ធំ បានឲ្យដឹងថា បទល្មើសដឹកជញ្ជូនឈើពីខេត្តឧត្ដរមានជ័យ ខេត្តព្រះវិហារ ខេត្តសៀមរាប ឆ្លងកាត់ខេត្តកំពង់ធំ ដែលនៅតែកើតឡើងយ៉ាងពេញបន្ទុកគឺជាប្រភពចំណូលដ៏សំខាន់របស់លោក ប៊ុន សុធី ព្រមទាំងបក្ខពួកមួយចំនួន។ ហេតុនេះហើយទើបលោក ប៊ុន សុធី នៅតែឃុបឃិតឲ្យមានបទល្មើសដឹកជញ្ជូនឈើឆ្លងកាត់ខេត្តកំពង់ធំ យ៉ាងគឃ្លើនជាពិសេសនៅពេលយប់ហើយថ្មីៗកន្លងទៅនេះរឿងអាស្រូវពុករលួយរបស់លោក ប៊ុន សុធី ក៏ត្រូវបានលាតត្រដាងជាបន្តបន្ទាប់ផងដែរ។ ដូច្នេះលោក វេង សាខុន រដ្ឋមន្ត្រីក្រសួងកសិកម្ម និងលោក អ៊ុង សំអាត ប្រធានរដ្ឋបាលព្រៃឈើនៃក្រសួងកសិកម្ម មិនគួរមើលរំលងភាពអសកម្មនិងអំពើពុករលួយរបស់លោក ប៊ុន សុធី នាយខណ្ឌរដ្ឋបាលព្រៃឈើខេត្តកំពង់ធំ នោះឡើយ។ ដោយហេតុថាចាប់តាំងពីលោក ប៊ុន សុធី ចូលកាន់តំណែងជាមេរដ្ឋបាលព្រៃឈើខេត្តកំពង់ធំ គឺបទល្មើសព្រៃឈើនៅខេត្តនេះបន្តកើតឡើងយ៉ាងពេញបន្ទុកដដែល៕
031 33 03 888