ប្រជាពលរដ្ឋក្នុងឃុំពពក ស្រុកស្ទោង ខេត្តកំពង់ធំ បានអំពាវនាវឲ្យលោក សុខ លូ អភិបាលខេត្តកំពង់ធំ ចាត់វិធានការតាមច្បាប់ទៅលើឈ្មួញឈ្មោះ រឿង រដ្ឋា ដែលប្រើគ្រឿងចក្រឈូសឆាយទន្ទ្រានកាន់កាប់ដីព្រៃរបស់រដ្ឋនៅក្នុងឃុំពពក ជាបន្ទាន់។ ដោយហេតុថាការដែលឈ្មួញឈ្មោះ រឿង រដ្ឋា អាចធ្វើអ្វីៗតាមអំពើចិត្តគឺមានការឃុបឃិតពីសំណាក់មេឃុំពពក អភិបាលស្រុកស្ទោង ក៏ដូចជាមន្ត្រីជំនាញពាក់ព័ន្ធដទៃទៀតនៅក្នុងស្រុកស្ទោង ផងដែរ។ ប្រជាពលរដ្ឋក្នុងឃុំពពក បានលើកឡើងថា ប្រសិនបើគ្មានការឃុបឃិតបើកដៃពីមេឃុំពពក និងលោក ណែត សារី អភិបាលស្រុកស្ទោង ទេនោះគឺមេឃុំ និងអភិបាលស្រុក ចាត់វិធានការបង្ក្រាបបទល្មើសតាំងពីចាប់ផ្ដើមដំបូងម្ល៉េះ។ ការដែលឈ្មួញឈ្មោះ រឿង រដ្ឋា អាចធ្វើសកម្មភាពឈូសឆាយទន្ទ្រានកាន់កាប់ដីព្រៃរបស់រដ្ឋយ៉ាងគឃ្លើននៅពេលនេះ គឺទាល់តែមានការបើកដៃពីសំណាក់មេឃុំពពក និងអភិបាលស្រុកស្ទោង ទើបអាចចៀសផុតពីការបង្ក្រាប។
ប្រភពពីប្រជាពលរដ្ឋរស់នៅឃុំពពក ស្រុកស្ទោងខេត្តកំពង់ធំ បានឲ្យដឹងថា ឈ្មួញឈ្មោះ រឿង រដ្ឋា ដែលជាម្ចាស់ស្ថានីយ៍ប្រេងឥន្ធនៈនៅឃុំប្រឡាយ បានប្រើគ្រឿងចក្រឈូសឆាយទន្ទ្រានកាន់កាប់ដីព្រៃសហគមន៍នៅតំបន់ដែនជម្រកសត្វព្រៃបឹងពែរ ឃុំពពក ស្រុកស្ទោង ខេត្តកំពង់ធំ ស្រេចតែអំពើចិត្ត។ ប្រភពខ្លះបានឲ្យដឹងថា ការដែលឈ្មួញឈ្មោះ រឿង រដ្ឋា ហ៊ានធ្វើអ្វីៗស្រេចតែអំពើចិត្តគឺមានការឃុបឃិតបើកដៃពីសំណាក់មេឃុំពពក ផងដែរទើបអ្វីៗអាចប្រព្រឹត្តទៅដោយរលូន។ ចំណែកលោក ណែត សារី អភិបាលស្រុកស្ទោង ខេត្តកំពង់ធំ មិនអាចគេចវេះពីការទទួលខុសត្រូវបានឡើយ ក្នុងខណៈដែលឈ្មួញឈ្មោះ រឿង រដ្ឋា បានប្រើគ្រឿងចក្រឈូសឆាយទន្ទ្រានកាន់កាប់ដីព្រៃរបស់រដ្ឋតាមអំពើចិត្ត។
តាមការអះអាងរបស់ប្រជាពលរដ្ឋរស់នៅក្នុងឃុំពពក ស្រុកស្ទោង ខេត្តកំពង់ធំ បានឲ្យដឹងថា កន្លងមកពួកគាត់បានឃើញមន្ត្រីអាជ្ញាធរស្រុកស្ទោង ចុះទៅពិនិត្យទីតាំងដែលឈ្មួញឈ្មោះ រឿង រដ្ឋា ប្រើគ្រឿងចក្រទន្ទ្រានកាន់កាប់ដីព្រៃរបស់រដ្ឋនៅក្នុងតំបន់ដែនជម្រកសត្វព្រៃបឹងពែរ ជាបន្តបន្ទាប់។ ក៏ប៉ុន្តែរហូតមកដល់ពេលនេះលោក ណែត សារី អភិបាលស្រុកស្ទោង មិនចាត់វិធានការទប់ស្កាត់សកម្មភាពបំផ្លាញព្រៃឈើរបស់ឈ្មួញឈ្មោះ រឿង រដ្ឋា នោះទេហើយបែរជាយកលែសថាតំបន់នោះជាតំបន់ព្រំប្រទល់រវាងខេត្តកំពង់ធំ និងខេត្តព្រះវិហារ ទៅវិញ។ ប្រការនេះហើយដែលប្រជាពលរដ្ឋរិះគន់ថាលោក ណែត សារី អភិបាលស្រុកស្ទោង កំពុងគេចវេះពីការទទួលខុសត្រូវក្នុងខណៈដែលឈ្មួញឈ្មោះ រឿង រដ្ឋា ប្រើគ្រឿងចក្រឈូសឆាយទន្ទ្រានកាន់កាប់ដីព្រៃរបស់រដ្ឋយកធ្វើជាកម្មសិទ្ធិឯកជនអស់ជាច្រើនហិកតារួចទៅហើយ។