ប្រភពពីមន្ត្រី និងសមត្ថកិច្ចនៅច្រកទ្វារអន្តរ ជាតិប៉ោយប៉ែត បានឲ្យដឹងថាលោក ស៊ាន ស៊ីណាត ប្រធានក្រុម មន្ត្រីកាំ កុង ត្រូល ប្រចាំច្រកទ្វារអន្តរជាតិ ប៉ោយប៉ែត និងជាប្រធាន សាខាកាំកុងត្រូលខេត្តបន្ទាយ មានជ័យ គឺជាអ្នកទទួល ខុសត្រូវធំជាង គេ។ ប្រភពបានឲ្យដឹងទៀតថា ប្រសិនបើគ្មានការឃុបឃិត បើកដៃពីសំណាក់លោក ស៊ាន ស៊ីណាត និងបក្ខពួកទេនោះគឺគ្មានឈ្មួញណាអាចនាំចូលគ្រឿងក្នុងជ្រូក១៧កេស និងចំណីអាហារខូចគុណភាពជាច្រើនប្រភេទទៀតពីទឹកដីសៀមមកទឹកដីខ្មែរបានឡើយ។ ទាល់តែមានការឃុបឃិតបើកដៃពីសំណាក់មន្ត្រីកាំកុងត្រូលនៅច្រកទ្វារអន្តរជាតិប៉ោយប៉ែត ទើបឈ្មួញអាចនាំគ្រឿងក្នុងជ្រូក សាច់មាន់ ឆ្លឹងមាន់ ស្លាបមាន់ និងប្រហិតខូចគុណភាពចូលតាមច្រកប៉ោយប៉ែត មកបំផ្លាញសុខភាពប្រជាពលរដ្ឋខ្មែរតាមអំពើចិត្ត។
សមត្ថកិច្ចនៅច្រកទ្វារអន្តរជាតិប៉ោយប៉ែត ខេត្តបន្ទាយមានជ័យ បានបង្ហើបឲ្យដឹងថាគ្រឿងចំណីអាហារខូចគុណភាពដូចជា គ្រឿងក្នុងជ្រូក សាច់មាន់ ស្លាបមាន់ ជង្គង់មាន់ និងប្រហិតមានលាយសារធាតុគីមីនៅតែត្រូវឈ្មួញនាំចូលពីទឹកដីសៀមតាមច្រកទ្វារអន្តរជាតិប៉ោយប៉ែតយ៉ាងពេញបន្ទុក។ ជាក់ស្ដែងកាលពីល្ងាចថ្ងៃទី០៥ ខែវិច្ឆិកា កន្លងទៅថ្មីៗនេះមានឈ្មួញលួចលាក់នាំចូលគ្រឿងក្នុងជ្រូក១៧កេសស្នោពីទឹកដីសៀមចូលទឹកដីខ្មែរយ៉ាងរលូន ហើយពលរដ្ឋខ្មែរដែលប្រទះឃើញបានរាយការណ៍ឲ្យសមត្ថកិច្ចពាក់ព័ន្ធចាត់វិធានការត្រួតពិនិត្យ។ ដោយហេតុថាគ្រឿងក្នុងជ្រូកទាំង១៧កេសស្នោនោះអាចមានលាយសារធាតុគីមីដើម្បីរក្សាគុណភាព ហើយសារធាតុគីមីនោះអាចធ្វើឲ្យប៉ះពាល់ដល់អ្នកទិញគ្រឿងក្នុងជ្រូកយកទៅចំអិនទទួលទាន។
ប្រភពពីសមត្ថកិច្ចពាក់ព័ន្ធបានឲ្យដឹងថា គ្រឿងក្នុងជ្រូកទាំង១៧កេសដែលឈ្មួញនាំចូលតាមច្រកទ្វារអន្តរជាតិប៉ោយប៉ែត កាលពីល្ងាចថ្ងៃទី០៥ ខែវិច្ឆិកា ឆ្នាំ២០១៧ ត្រូវបានឈ្មួញលើកដាក់រថយន្តហាយឡេនឌ័រ ពណ៌ទឹកប្រាក់ ដែលមានស្លាកលេខ2AH-0279 ដើម្បីយកទៅចែកចាយតាមបណ្ដាខេត្តនានា ហើយក៏អាចចូលមកដល់រាជធានីភ្នំពេញផងដែរ។ ទីតាំងដែលក្រុមឈ្មួញផ្ទេរគ្រឿងក្នុងជ្រូក១៧កេសពីរទេះទៅរថយន្តហាយឡេនឌ័រ គឺធ្វើឡើងនៅភូមិក្បាលស្ពាន១ ក្រុងប៉ោយប៉ែត ខេត្តបន្ទាយមានជ័យ។ អ្វីដែលគួរឲ្យកត់សម្គាល់នោះគឺកម្មការអូសរទេះបានបញ្ជាក់ថា ទំនិញនៅក្នុងកេសស្នោទាំង១៧នោះ ជាប្រភេទគ្រឿងក្នុងជ្រូកចម្រុះហើយក៏មានការបង់លុយឲ្យមន្ត្រីកាំកុងត្រូលនៅច្រកប៉ោយប៉ែតរួចរាល់ផងដែរ។ ដូច្នេះលោក ម៉ក់ ពេជ្ជរិទ្ធ អគ្គនាយកនៃអគ្គនាយកដ្ឋានកាំកុងត្រូលក្រសួងពាណិជ្ជកម្ម គួរពិនិត្យមើលអំពើពុករលួយរបស់លោក ស៊ាន ស៊ីណាត ប្រធានសាខាកាំកុងត្រូលខេត្តបន្ទាយមានជ័យ និងបក្ខពួកខ្លះផងព្រោះពួកគេកំពុងឃុបឃិតឲ្យឈ្មួញនាំចូលចំណីអាហារគ្រឿងឧបភោគបរិភោគមានលាយសារធាតុគីមី និងខូចគុណភាព ៕
031 33 03 888