ប្រជាសហគមន៍ការពារព្រៃឈើ នៅក្នុងខេត្តមណ្ឌលគិរី បានឲ្យដឹងថា បច្ចុប្បន្នបទល្មើស កាប់ឈើនិងដឹក ជញ្ជូនឈើចេញទៅ ស្រុកយួនតាមច្រកដាក់ ដាំ នៅតែបន្តកើតឡើង យ៉ាងអនាធិបតេយ្យ ហើយឈ្មួញមានការ ឃុបឃិតជាមួយ លោក យ៉ូ សុធា មេនគរបាលអន្តោ ប្រវេសន៍ច្រកដាក់ដាំផងដែរ។ ក្នុងនោះឈ្មួញដែលមានខ្នងបង្អែករឹងមាំនៅតែអាចដឹកជញ្ជូនឈើចេញតាមច្រកដាក់ដាំ និងច្រករបៀងកង់ឡង់យ៉ាងពេញបន្ទុក ហើយឈ្មួញទាំងឡាយណាដែលចង់គេចវេះមិនបង់លុយឲ្យសមត្ថកិច្ចតែងត្រូវប្រឈមនឹងការបង្ក្រាបយកស្នាដៃជាមិនខាន។ បញ្ហានេះលោក វេង សាខុន រដ្ឋមន្ត្រីក្រសួងកសិកម្ម រុក្ខាប្រមាញ់និងនេសាទ មិនគួរមើលរំលងតទៅទៀតទេ ព្រោះឈ្មួញនៅតែអាចកាប់ឈើនិងដឹកជញ្ជូនឈើចេញពីខេត្តមណ្ឌលគិរី យ៉ាងពេញបន្ទុកហើយមេឈ្មួញ សឹង សំអុល និងមេឈ្មួញ តុប វីរ៉ាដា គ្មានមន្ត្រីជំនាញនិងសមត្ថកិច្ចពាក់ព័ន្ធហ៊ានប៉ះពាល់ឡើយ។
មន្ត្រីអង្គការក្រៅរដ្ឋាភិបាល និងសកម្មជនព្រៃឈើក្នុងខេត្តមណ្ឌលគិរី បានឲ្យដឹងថាបច្ចុប្បន្នបទល្មើសនិងដឹកជញ្ជូនឈើប្រណីតចេញទៅស្រុកយួនតាមច្រកដាក់ដាំ ស្រុកអូររាំង ខេត្តមណ្ឌលគិរី នៅតែបន្តកើតឡើងយ៉ាងពេញបន្ទុក ជាពិសេសនៅពេលយប់។ ប្រភពបានឲ្យដឹងទៀតថា ឈ្មួញដែលមានខ្នងបង្អែកជាមន្ត្រីនគរបាលពាក់ផ្កាយ២នៅក្រសួងមហាផ្ទៃ និងមានងារជាឧកញ៉ាផងនោះ អាចដឹកជញ្ជូនឈើឆ្លងបារ៉ាស់ច្រកដាក់ដាំ ចេញទៅស្រុកយួនយ៉ាងរលូនដោយគ្មានមន្ត្រីជំនាញឬសមត្ថកិច្ចណាប៉ះពាល់ឡើយ។ ចំណែកឈ្មួញមួយចំនួនដែលមិនបង់លុយតាមការកំណត់ត្រូវប្រឈមនឹងការបង្ក្រាបចៀសមិនផុតទេ ទោះបីឈ្មួញទាំងនោះបង្កប់ឈើប្រណីតតាមរថយន្តក្រុងដឹកជញ្ជូនអ្នកទេសចរក៏ដោយ។
កាលពីថ្ងៃទី០៧ ខែតុលា ឆ្នាំ២០១៧ កម្លាំងអាវុធហត្ថខេត្តមណ្ឌលគិរី បានស្ទាក់ចាប់រថយន្តក្រុងរបស់យួន១គ្រឿងដែលមានបង្កប់ឈើប្រណីតជាច្រើនដុំក្នុងគម្រោងចេញពីខេត្តមណ្ឌលគិរី ចេញទៅស្រុកយួនតាមច្រកដាក់ដាំ ដែលមានចម្ងាយ៣០គីឡូម៉ែត្រពីទីរួមខេត្តមណ្ឌលគិរី។ ប្រភពពីសមត្ថកិច្ចអាវុធហត្ថបានឲ្យដឹងថា មានឈើប្រណីតប្រភេទនាងនួន និងធ្នង់ជាច្រើនកំណាត់ត្រូវបានឈ្មួញលាក់ទុកក្នុងបាតរថយន្តក្រុងរបស់យួនពាក់ស្លាកលេខ1B-001.17 ដែលតែងតែដឹកភ្ញៀវទេសចរពីស្រុកយួនចូលមកខេត្តមណ្ឌលគិរីជាញឹកញាប់។ ប្រភពខ្លះបានឲ្យដឹងថា ប្រហែលមកពីម្ចាស់ឈើចង់គេចវេះមិនបង់លុយឲ្យសមត្ថកិច្ចទើបត្រូវកម្លាំងអាវុធហត្ថបង្ក្រាបយកស្នាដៃ។