ព្រះវិហារ៖ ផ្លូវក្រាលគ្រួសក្រហមមួយខ្សែ ប្រវែងត្រឹមតែ១ពាន់១រយ(១១០០)ម៉ែត្រ ត្រូវបានសាលាក្រុងព្រះវិហារ ចំណាយលុយជួសជុលអស់៤៨០លានរៀល ឬប្រមាណជា១០ម៉ឺនដុល្លាអាម៉េរិក ដែលចំនួនទឹកប្រាក់នេះ ត្រូវបានគេមើលឃើញថា ជាចំនួនដ៏ច្រើនលើសលុប។ ផ្លូវគ្រួសក្រហមមួយខ្សែនេះ ស្ថិតនៅក្នុងភូមិភារកិច្ចកណ្តាល សង្កាត់ប៉ាលហាល ក្រុងព្រះវិហារ ខេត្តព្រះវិហារ។
យោងតាម ផ្លាកសម្គាល់គម្រោងបានឲ្យដឹងថា ផ្លូវក្រាលគ្រួសក្រហមនេះ មានប្រវែង១១០០(មួយពាន់មួយរយ)ម៉ែត្រ ត្រូវដាក់លូ០៣កន្លែង នឹងបង្គោលសូឡា២២ដើម។ គម្រោងនេះ ត្រូវប្រើថវិកាសរុបចំនួន៤៨២.៥៣០.០០០(បួនរយប៉ែតពីរលានហាសិបបីម៉ឺន)រៀល ឬប្រហាក់ប្រហែលជា១០ម៉ឺនដុល្លាអាម៉េរិក ហើយផ្លូវនេះត្រូវអនុវត្តកិច្ចសន្យាដោយក្រុមហ៊ុនគង់សុផាត។
តាមប្រភពពីអ្នកដែលមានអាជីវកម្មសាងសង់ផ្លូវថ្នល់ ក្នុងខេត្តព្រះវិហារ បានឲ្យដឹងថា តម្លៃជួសជុលផ្លូវខាងលើជាតម្លៃមួយដែលខ្ពស់ហួសហេតុ និងមិនធ្លាប់ជួបពីមុនមក។ ប្រភពថា តម្លៃនេះ ជាការគប់គិតគ្នាបំផ្លាញលុយជាតិ ព្រោះផ្លូវប្រភេទនេះ ប្រើសិនបើសាងសង់ថ្មីក្នុងមួយគីឡូម៉ែត្រយ៉ាងច្រើនអស់០៣ម៉ឺនដុល្លាអាម៉េរិកប៉ុណ្ណោះ។
ពាក់ព័ន្ធការលើកឡើងនេះ លោក ប៉ុក ងួន អភិបាលក្រុងព្រះវិហារ បានប្រាប់មេគង្គញូសរ៍ តាមទូរស័ព្ទថា ការជួសជុលផ្លូវនេះ លោកបានធ្វើតាមនីតិវិធីលទ្ធកម្មត្រឹមត្រូវ ដោយមានបិទផ្សាយ មានការដេញថ្លៃត្រឹមត្រូវ។ លោកថា កាលពីមុនផ្លូវនេះប្រជាពលរដ្ឋពិបាកធ្វើដំណើរណាស់ ដូច្នេះការជួសជុលផ្លូវនេះ ជាការអភិវឌ្ឍក្រុង និងស្របតាមនីតិវិធីលទ្ធកម្មទាំងអស់។
យោងតាមប្រភព ពីគណៈកម្មាធិការជាតិសម្រាប់ការអភិវឌ្ឍតាមបែបលទ្ធិប្រជាធិបតេយ្យនៅថ្នាក់ក្រោមជាតិ ហៅកាត់ថា គ.ជ.អ.ប. បានធ្វើការប៉ាន់ប្រមាណនូវគម្រោងសាងសង់ និងជួសជុលផ្លូវក្រាលក្រួសក្រហមប្រវែង១.៦៤២ម៉ែត្រ នៅឃុំសង្កែមួយ ស្រុកឆែប ខេត្តព្រះវិហារ ដោយដាក់លូកាត់ផ្លូវទោលអង្កត់ផ្ចិត០,៦០ម៉ែត្រ ប្រវែង៦ម៉ែត្រ ចំនួន១កន្លែង លូកាត់ផ្លូវទោលអង្កត់ផ្ចិត១ម៉ែត្រ ប្រវែង៧ម៉ែត្រ ចំនួន១កន្លែង លូកាត់ផ្លូវភ្លោះ អង្កត់ផ្ចិត១ម៉ែត្រ ប្រវែង៩ម៉ែត្រ ចំនួន១កន្លែង ភ្លើងសូឡាបំភ្លឺផ្លូវសាធារណៈចំនួន៤កន្លែង និងស្លាកសញ្ញាគម្រោងចំនួន១កន្លែង មានតម្លៃ១៣២.៧១៤.៦០០(មួយរយសាមសិបពីរលានចិតសិបមួយម៉ឺនបួនពាន់ប្រាំមួយរយ)រៀល ឬប្រហែល៣ម៉ឺនដុល្លាអាម៉េរិកប៉ុណ្ណោះ៕