ភ្នំពេញ ៖ ប្រជាពលរដ្ឋ ក៏បានជួបប្រមូលផ្តុំគ្នាលើដីឡូតិ៍ដែលពួកគាត់ទិញ និងខ្លះធ្វើផ្ទះរស់នោះរួចរាល់ហើយ នៅក្នុងភូមិភ្លូរផ្អែម សង្កាត់គោករការ ខណ្ឌព្រែកព្នៅ រាជធានីភ្នំពេញ ការតវ៉ានេះ បានផ្ទុះឡើងកាលពី ថ្ងៃទី០១ ខែមិថុនា ឆ្នាំ២០២២ ។ ប្រជាពលរដ្ឋក៏បានទទួចសុំដល់សម្តេចតេជោ ហ៊ុន សែន មេត្តាជួយអន្តរាគមន៍ជាលើកទី២ បន្ទាប់ពីអន្តរាគមន៍ លើកជាទី១ បានត្រឹមតែកិច្ចសន្យា សះជា និងបញ្ចប់វិវាទនៅក្រដាស់ តែលោកឧកញ៉ា អ៊ឹង ឃាង មិនបានគោរពនូវកិច្ចសន្យារបស់ខ្លួន ប្រគល់ប្លង់អោយពួកគាត់តាមកិច្ចសន្យាក្រោមការសម្របសម្រួលដោះស្រាយពីសំណាក់លោកដួង តារា ជំនួយការផ្ទាល់ និងជាតំណាងដ៏ខ្ពស់ខ្ពស់សម្តេចតេជោ នោះឡើយ ។
ប្រជាពលរដ្ឋក៏បានកាន់ និងលើករូបថតសម្តេចតេជោ ហ៊ុន សែន និងរូបសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន និងលើកបដាផ្ជាប់ជាមួយរូបថតលោកឧកញ៉ា អ៊ឹង ឃាង ផងដែរ។ បដា ដែលមានខ្លឹមសារអោយដឹងថា «សូមសម្តេចពុក មេត្តាជួយប្រជាពលរដ្ឋជាលើកទី២ », សូមអោយលោកឧកញ៉ា អ៊ឹង ឃាង ប្រគល់ប្លង់កម្មសិទ្ធិដីជូនប្រជាពលរដ្ឋ» និងសូមអោយលោកឧកញ៉ា អ៊ឹង ឃាង ប្រគល់ប្លង់កម្មសិទ្ធិជូនប្រជាពលរដ្ឋតាមការកំណត់ នៃកិច្ចសន្យាសះជា » ជាដើម ។
តាមប្រជាពលរដ្ឋ ក៏បានអោយដឹងទៀត បន្ទាប់ពីពួកគាត់លើកបដាតវ៉ា និងមានការអន្តរាគមន៍ពីសម្តេចតេជោ ហ៊ុន សែន នៅថ្ងៃទី១១ ខែសីហា ឆ្នាំ២០២១ លោកឧកញ៉ា អ៊ឹង ឃាង និងលោកឧកញ៉ា ឡាយ លន់ ដែលជាតំណាងលក់ក៏បានជួបជាមួយជាមួយប្រជាពលរដ្ឋ និងមានការសម្របសម្រួលពីលោក ដួង តារា ជំនួយការផ្ទាល់សម្តេចតេជោហ៊ុន សែន ធ្វើកិច្ច សន្យា សះជា និងបញ្ចប់វិវាទ ដោយសន្យាថា នឹងប្រគល់ប្លង់ដីស្របច្បាប់ជួនពួកគាត់ទាំង៣៧គ្រួសារ តែលោកឧកញ៉ាទាំងពីរនាក់ខាងលើ មិនបានគោរព និងអនុវត្តតាមកិច្ចសន្យាឡើយ ។
នៅក្នុងរយៈពេលកន្លងមកនេះ ពួកគាត់ក៏បានធ្វើលិខិតជូនដំណឹងទាមទារជាប្លង់កម្មសិទ្ធិពីលោកឧកញ៉ា អ៊ឹង ឃាង និងលោកឧកញ៉ា ឡាយ លន់ តាមរយៈពេលលោក ដួង តារា អោយជួយអន្តរាគមន៍បន្ថែមចំនួន៣លើកមកហើយ តែពុំបានជាផ្លែផ្កា។
ប្រជាពលរដ្ឋ ក៏បានលើកដៃទទួចស្នើសុំសម្តេចតេជោ ហ៊ុន សែន មេត្តាជួយអន្តរាគមន៍អោយលោកឧកញ៉ា អ៊ឹង ឃាង ដែលជាអ្នកលក់ដីឡូតិ៍ខាងលើ បំពេញកាតព្វកិច្ចលើកិច្ចសន្យា សះជា និងបញ្ចប់វិវាទធីធ្លីរបស់សម្តេច និងកិច្ចសន្យាផ្សេងៗទៀត ដើម្បីផ្ទេរ និងប្រគល់ប្លង់កម្មសិទ្ធិពួកគាត់ដោយអនុគ្រោះផងចុះ ៕
031 33 03 888