ប្រភពពីប្រជាពលរដ្ឋ បានឲ្យដឹងថា បុគ្គលឈ្មោះ តាហាន និងបក្ខពួកច្រើននាក់សហការគ្នាបើកសង្វៀនបញ្ជល់មាន់ និងវង់អាប៉ោង ក្នុងភូមិទួលក្រសាំង សង្កាត់ជ្រាវ ក្រុងសៀមរាប ប្រមូលលុយពីក្រុមអ្នកញៀនល្បែងបានយ៉ាងច្រើនជារៀងរាល់ថ្ងៃ។ ល្បែងបញ្ជល់មាន់បើកលេងទ្រង់ទ្រាយធំដោយមានការដាក់ដើមថាន់រាប់លានរៀល ឬរាប់ពាន់ដុល្លារក្នុងមួយគូៗ ហើយល្បែងអាប៉ោងក៏ស៊ីសងក្នុងមួយគ្របៗរាប់លានរៀលផងដែរ ព្រោះមេល្បែងស៊ីសងធានាសន្តិសុខដល់អតិថិជនរបស់ខ្លួន។ ប្រជាពលរដ្ឋបានលើកឡើងថា ប្រសិនបើគ្មានការបើកដៃពីមន្ត្រីអាជ្ញាធរ និងសមត្ថកិច្ចមូលដ្ឋានទេនោះ គឺគ្មានអ្នកណាអាចបើកល្បែងស៊ីសងក្នុងភូមិទួលក្រសាំង សង្កាត់ជ្រាវ ក្រុងសៀមរាប បានឡើយ។
សេចក្ដីរាយការណ៍ពីប្រជាពលរដ្ឋនៅភូមិទួលក្រសាំង សង្កាត់ជ្រាវ ក្រុងសៀមរាប ខេត្តសៀមរាប បានឲ្យដឹងថា សង្វៀនបញ្ជល់មាន់ និងវង់អាប៉ោង ក្នុងមូលដ្ឋានពួកគាត់ដែលបានបិទមួយរយៈពេលខ្លីនោះ ឥឡូវបើកដំណើរការឡើងវិញហើយ។ ប្រជាពលរដ្ឋបានឲ្យដឹងទៀតថា មានបុគ្គលម្នាក់ឈ្មោះ តា ហាន បានមកបើកសង្វៀនបញ្ជល់មាន់ និងវង់អាប៉ោង ខុសច្បាប់គ្រប់ប្រភេទឡើងវិញយ៉ាងរលូន ហើយមានអ្នកចូលរួមលេងល្បែងយ៉ាងពពាក់ពពូនគ្មានញញើតអ្វីទាំងអស់។ នាយប៉ុស្តិ៍នគរបាលរដ្ឋបាលសង្កាត់ជ្រាវ និងលោក ដា ចំរើន អធិការនគរបាលក្រុងសៀមរាប ព្រមទាំងលោក នួន ពុទ្ធារ៉ា អភិបាលក្រុងសៀមរាប កំពុងបណ្ដោយឲ្យល្បែងស៊ីសងខុសច្បាប់កើតឡើងពេញបន្ទុក។
ប្រជាពលរដ្ឋបានអំពាវនាវឲ្យលោក តេង ច័ន្ទណាត ស្នងការនគរបាលខេត្តសៀមរាប និងលោក ទៀ សីហា អភិបាលក្រុងសៀមរាប ចាត់វិធានការបង្ក្រាបល្បែងស៊ីសងក្នុងសង្កាត់ជ្រាវ ក្រុងសៀមរាប ជាបន្ទាន់ ដើម្បីពង្រឹងសន្តិសុខសង្គម។ ដោយហេតុថាផ្ដើមចេញពីល្បែងស៊ីសងខុសច្បាប់ដែលកើតឡើងយ៉ាងរាលដាលនោះហើយ ទើបក្នុងសង្កាត់ជ្រាវ ក្រុងសៀមរាប កើតមានអំពើចោរកម្ម អំពើហិង្សាក្នុងគ្រួសារ និងបទល្មើសផ្សេងៗធ្វើឲ្យប៉ះពាល់យ៉ាងខ្លាំងដល់សន្តិសុខសង្គម។ ប្រជាពលរដ្ឋបានរិះគន់ចំៗថាលោក ដា ចំរើន អធិការនគរបាលក្រុងសៀមរាប និងលោក នួន ពុទ្ធារ៉ា អភិបាលក្រុងសៀមរាប មិនសូវយកចិត្តទុកដាក់បង្ក្រាបល្បែងស៊ីសងខុសច្បាប់ ដើម្បីពង្រឹងសន្តិសុខសង្គម។បឋម
031 33 03 888