ខេត្តកណ្តាល ÷ ប្រជាពលរដ្ឋរស់នៅក្បែរទីតាំងដីនេះ ដែលស្ថិតក្នុងភូមិបារាច ឃុំស្វាយជ្រុំ ស្រុកខ្សាច់កណ្តាល ខេត្តកណ្តាល បាននិយាយថា ដីនេះជាប្រភេទដីចំណីទន្លេ ច្រាំងខាងកើតទន្លេមេគង្គ ត្រូវក្រុមឈ្មួញប្រើរូបភាពដើរប្រមូលទិញពីអ្នកភូមិ ដែលធ្លាប់បានអាស្រ័យផលលើដីច្រាំងទន្លេទាំងនេះ ប៉ុន្តែមិនមានឯកសារទទួលស្គាល់កម្មសិទ្ធិគ្រប់គ្រាន់ឡើយ។
អ្នកភូមិខ្លះ ដែលបានដឹងប្រវត្តិដីចំណីទន្លេខាងលើនេះ បាននិយាយថា អ្នកធ្លាប់អាស្រ័យផលអ្នកខ្លះ លក់ដីចំណីទន្លេនេះក្នុងទឹកប្រាក់ពី២០ ០០០ដុល្លារ ទៅ៣០ ០០០ដុល្លារ តាមទំហំជាក់ស្តែង ដោយក្រុមអ្នកប្រមូលទិញដី ប្រាប់ពួកគាត់ថា លោក គុណ ញឹម អគ្គនាយកដ្ឋានគយ និងរដ្ឋាករ កម្ពុជា ជាអ្នកឲ្យទិញ ដើម្បីយកធ្វើជាកម្មសិទ្ធិឯកជន។
បុរសម្នាក់ ឈ្មោះ ថា ប៊ុនថន ដែលគេដឹងថា ជាអ្នកមើលដីថែដីជូនលោក គុណ ញឹម បាននិយាយព្រមាន និងជេរប្រមាទ អ្នកសារព័ត៌មាន ដែលបានទាក់ទងសម្ភាសន៍ជុំវិញករណីចាក់ដីយកចំណីទន្លេនេះ។
លោក ថា ប៊ុនថន បានឆ្លើយតបជាមួយអ្នកសារព័ត៌មាន កាលពីពេលថ្មីៗកន្លងមកនេះថា «បើចង់ដឹង សូមទាក់ទងទៅអភិបាលខេត្ត [កណ្តាល លោក គង់ សោភណ្ឌ]។ បងធ្វើអ្វីក៏ដោយ កុំឲ្យខ្ញុំខឹង»។
ប្រភពច្បាស់ការណ៍ បានឲ្យដឹងទៀតថា លោក គុណ ញឹម បានទិញដីចំណីទន្លេ ដែលជាសម្បត្តិរបស់រដ្ឋ ហើយ កំពុងសម្រុកឲ្យគ្រឿងចក្រជាច្រើនគ្រឿង ដឹកជញ្ជូនអាចម៌ដីចាក់រំលោភយកច្រាំងទន្លេ ដើម្បីធ្វើជាកម្មសិទ្ធិផ្ទាល់ខ្លួន ដោយមិនមានអាជ្ញាធរណាមួយរារាំងឡើយ។
អង្គភាពយើងខ្ញុំ មិនអាចទាក់ទងសុំការបកស្រាយពីលោក គង់ សោភណ្ឌ និងលោក គុណ ញឹម បាននៅឡើយទេ។
បើយោងតាមអនុក្រឹត្យលេខ៩៨ អនក្រ.បក ចុះថ្ងៃទី២៤ ខែកក្តដា ឆ្នាំ២០១៥ ស្តីពីការគ្រប់គ្រងដីចំណីទន្លេ ស្ទឹង បឹង ព្រែក ប្រឡាយ អាង ដែលជាដីទ្រព្យសម្បត្តិសាធារណៈរបស់រដ្ឋ បានបញ្ជាក់យ៉ាងច្បាស់ថា គ្មានបុគ្គលណាម្នាក់មានសិទ្ធិទិញលក់ ឬយកធ្វើកម្មសិទ្ធិឯកជនឡើយ។ ប៉ុន្តែចំពោះករណីនេះ ត្រូវបានមហាជនមើលឃើញថា អ្នកមានលុយ និងមានអំណាច អាចចាក់ ដីលុប យកច្រាំងទន្លេ ហើយពុំឃើញមានអាជ្ញាធរពាក់ព័ន្ធរារាំង ឬចាត់វិធានការផ្លូវច្បាប់ទៅលើបុគ្គទាំងនោះឡើយ ។ បឋម
031 33 03 888