ប្រភពច្បាស់ការថា ឈ្មោះសាក់ សិច ជាឈ្មួញឈើបាននិងកំពុង បង់លុយឲ្យមន្ត្រីបរិស្ថានការពារដែនជម្រកសត្វព្រៃព្រះរកា និងព្រៃឡង់ ដែលជាសំណូកពុករលួយ គ្រប់ស្ថាប័នពាក់ព័ន្ធបើកភ្លើងខៀវឲ្យធ្វើអាជីវកម្មបំផ្លិចបំផ្លាញព្រៃឈើរបស់ជាតិ ទើបមិនដែលធ្វើការការបង្ក្រាប។
ជាហេតុធ្វើឲ្យព្រៃឡង់ និងព្រៃព្រះរកា ក្នុងខេត្តព្រះវិហារ ត្រូវប្រឈមនឹងសេចក្តីវិនាសក្នុងពេលដ៏ឆាប់ៗខាងមុខនេះ ព្រោះតែឈ្មួញឈើឈ្មោះសាក់ សិច ម្នាក់នេះ នៅតែអាចដឹកជញ្ជូនឈើចេញពីតំបន់ព្រៃឡង់ និងព្រៃព្រះរកា យ៉ាងគំហុកដោយគ្មានមន្ត្រីជំនាញ និងសមត្ថកិច្ចណាបង្ក្រាបឡើយ។
ប្រភពព័ត៌មានពីប្រជាពលរដ្ឋនៅភូមិអូរទីទុយ ឃុំព្រះឃ្លាំង ស្រុកត្បែងមានជ័យ បានអោយដឹងថាមកដល់ពេលនេះឈ្មួញឈ្មោះសាក់ សិច នៅតែធ្វើសកម្មភាពដឹកជញ្ជូនឈើពីតំបន់ព្រៃឡង់ស្រុកជ័យសែន និងព្រៃព្រះរកាស្រុកត្បែងមានជ័យ និងស្រុកឆែប យកទៅរក្សាទុកក្នុងទីតាំងមួយកន្លែងនៅចំណុចភូមិអូរទីទុយ យ៉ាងពេញបន្ទុកដោយផ្អែកទៅលើច្បាប់ដេប៉ូ។
ប្រភពបានឲ្យដឹងទៀតថា មន្ត្រីរដ្ឋបាលព្រៃឈើ និងសមត្ថកិច្ចពាក់ព័ន្ធក្នុងស្រុកត្បែងមានជ័យ មិនហ៊ានប៉ះពាល់ឈ្មួញឈ្មោះសាក់ សិច ម្នាក់នេះទាល់តែសោះប្រហែលពួកគេខ្លាចបាត់បង់ប្រភពចំណូលរៀងៗខ្លួន។ សូម្បីតែលោក ពឹង ទ្រីដា ប្រធានមន្ទីរកសិកម្មរុក្ខាប្រម៉ាញ់និងនេសាទខេត្តព្រះវិហារ និងលោក នួន សុខុម នាយខណ្ឌរដ្ឋបាលព្រៃឈើខេត្តព្រះវិហារ លោក សុង ច័ន្ធសុជាតិ ប្រធានមន្ទីបរិស្ថានខេត្តក៏រក្សាភាពស្ងៀមស្ងាត់ផងដែរ ហើយបណ្តោយឲ្យឈ្មួញឈ្មោះសាក់ សិច នេះប្រកបការដឹកជញ្ជូនឈើចេញពីព្រៃឡង់ និងព្រៃព្រះរកា យ៉ាងសុខស្រួល។
ប្រភពពីប្រជាពលរដ្ឋបានបន្ថែមទៀតថា ក្នុងមួយយប់ៗឈ្មួញឈ្មោះ សិច នេះបានដឹកជញ្ជូនឈើចេញពីព្រៃឡង់ និងព្រៃព្រះរកា ចូលមកទីតាំងរក្សាទុកក្នុងភូមិអូរទីទុយ ឃុំព្រះឃ្លាំង ស្រុកត្បែងមានជ័យ យ៉ាងតិចពី៤ទៅ៥រថយន្តសាំយ៉ុងកែច្នៃ ហើយមានបរិមាណរាប់សិបម៉ែត្រគូប។
មន្ត្រីអង្គការក្រៅរដ្ឋាភិបាលដែលឃ្លាំមើលបទល្មើសព្រៃឈើក្នុងខេត្តព្រះវិហារ បានអំពាវនាវឲ្យថ្នាក់ដឹកនាំគណៈកម្មការជាតិដើម្បីទប់ស្កាត់បទល្មើសធនធានធម្មជាតិ សូមអោយចាត់វិធានការបង្ក្រាបឈ្មួញឈ្មោះ សាក់ សិច ដែលជាម្ចាស់ទីតាំងរក្សាទុកឈើនៅចំណុចភូមិអូរទីទុយ ឃុំព្រះឃ្លាំង ស្រុកត្បែងមានជ័យ ជាបន្ទាន់។
ដោយហេតុថា បច្ចុប្បន្ននេះឈ្មួញឈើឈ្មោះសាក់ សិច ម្នាក់នេះនៅតែធ្វើសកម្មភាពដឹកជញ្ជូនឈើយ៉ាងពេញបន្ទុកហើយ ឯចំណែក លោក ប្រាក់ សុវណ្ណ អភិបាលខេត្តព្រះវិហារ ព្រមទាំងលោក ពឹង ទ្រីដា ប្រធានមន្ទីរកសិកម្មខេត្តព្រះវិហារ និងលោក នួន សុខុម នាយខណ្ឌរដ្ឋបាលព្រៃឈើខេត្តព្រះវិហារ លោក សុង ច័ន្ធសុជាតិ ប្រធានមន្ទីបរិស្ថានខេត្ត អាក់សមត្ថភាពក្នុងការបង្គ្រាប បានពួនសម្ងំធ្វើមិនដឹងមិនឮអ្វីទាំងអស់៕
031 33 03 888