កំពត ÷ មួយរយៈចុងក្រោយនេះបណ្តាញព័ត៌មាននានាបានចុះផ្សាយជាបន្តបន្ទាប់ជុំវិញករណីល្បែងស៊ីសងខុសច្បាប់ ដូចជាសង្វៀនបញ្ជល់មាន់ និងវង់អាប៉ោង កើតឡើងតាមបណ្តាភូមិអូរតូចសង្កាត់អណ្ដូងខ្មែរក្រុងកំពតខេត្តកំពតដែលជាហេតុធ្វើឲ្យប្រជាពលរដ្ឋព្រួយបារម្ភយ៉ាងខ្លាំងពីបញ្ហាអសន្តិសុខសង្គម ដែលកើតចេញពីល្បែងស៊ីសង។
ទន្ទឹមនឹងនេះមានការរិះគន់ចំៗទៅលើលោក អធិការនគរបាលក្រុងកំពត ដែលបណ្តោយឲ្យល្បែងស៊ីសងខុសច្បាប់កើតឡើងយ៉ាងរាលដាល ហើយការបង្ក្រាបបានត្រឹមតែធ្វើឲ្យល្អមើលគ្មានប្រសិទ្ធភាព។ ប្រជាពលរដ្ឋបានអំពាវនាវឲ្យលោក ម៉ៅ ចន្ទ័មុធុរិទ្ធ ស្នងការនគរបាលខេត្តកំពតនិងលោក ម៉ៅ ធនិន អភិបាលខេត្តកំពតចាត់វិធានការបង្ក្រាបល្បែងស៊ីសងក្នុងក្រុងកំពត ប្រកបដោយប្រសិទ្ធភាព ដើម្បីពង្រឹងសន្តិសុខសង្គម។
ឥឡូវនេះប្រភពពីប្រជាពលរដ្ឋក្នុងភូមិអូរតូចសង្កាត់អណ្ដូងខ្មែរក្រុងកំពតខេត្តកំពត បានឲ្យដឹងថា គេបើកសង្វៀនបញ្ជល់មាន់និងវង់អាប៉ោងទ្រង់ទ្រាយធំដំណើរការយ៉ាងរលូន។ ប្រជាពលរដ្ឋបានបញ្ជាក់ថា នាយប៉ុស្តិ៍នគរបាលរដ្ឋបាលនិងលោក អធិការនគរបាលក្រុងកំពត មិនចាត់វិធានការបង្ក្រាបល្បែងស៊ីសងខុសច្បាប់នោះឡើយទេ។
ក្នុងមួយថ្ងៃៗមានអ្នកចូលរួមលេងល្បែងស៊ីសងយ៉ាងពពាក់ពពូន មិនខ្លាចជំងឺឆ្លងអ្វីទាំងអស់ ហើយមេល្បែងស៊ីសងត្រូវគេដឹងថា មានទំនាក់ទំនងជិតស្និទ្ធជាមួយសមត្ថកិច្ចគ្រប់លំដាប់ថ្នាក់។
សេចក្តីរាយការ ណ៍ពីប្រជាពលរដ្ឋបានលើកឡើងថា ទាល់តែមានការបើកដៃពីសំណាក់មន្ត្រីអាជ្ញាធរ និងសមត្ថកិច្ចមូលដ្ឋានទើបគេអាចបើកល្បែងស៊ីសងខុសច្បាប់យ៉ាងពេញបន្ទុក ហើយមេល្បែងស៊ីសងអាចប្រមូលលុយបានយ៉ាងច្រើនជារៀងរាល់ថ្ងៃ។
ដូច្នេះលោក ម៉ៅ ចន្ទ័មុធុរិទ្ធ ស្នងការនគរបាលខេត្តកំពតនិងលោក ម៉ៅធនិន អភិបាលខេត្តកំពត មិនគួរបណ្តែតបណ្តោយតទៅទៀតទេ ព្រោះមួយរយៈពេលចុងក្រោយនេះនៅក្នុងក្រុងកំពត ល្បែងស៊ីសងខុសច្បាប់រាលដាលពីសង្កាត់មួយទៅសង្កាត់មួយគ្មានទីបញ្ចប់ឡើយ។
ទន្ទឹមនឹងនេះប្រជាពលរដ្ឋបានអំពាវនាវឲ្យថ្នាក់ដឹកនាំក្រសួងមហាផ្ទៃ និងនាយឧត្តមសេនីយ៍ នេត សាវឿន អគ្គស្នងការនគរបាលជាតិ ពិនិត្យទៅលើភាពអសកម្មរបស់មន្ត្រីអាជ្ញាធរខេត្តកំពត និងសមត្ថកិច្ចនគរបាលខេត្តកំពតផងដែរ។មានត
031 33 03 888