ប្រភពស្និទ្ធនឹងឈ្មួញឈ្មោះ អៀង បានឲ្យដឹងថា ឈ្មួញម្នាក់នេះតែងតែធ្វើសកម្មភាពប្រមូលទិញឈើពីអ្នកកាប់ឈើក្នុងតំបន់ព្រៃការពារ ព្រៃអភិរក្សនៃស្រុកជាំក្សាន្ត និងស្រុកគូលែន ខេត្តព្រះវិហារ ហើយដឹកជញ្ជូនចូលមកស្រុកត្រពាំងប្រាសាទ នៅពេលយប់។ ប្រភពបានឲ្យដឹងថា ឈ្មួញឈ្មោះ អៀង តែងបង់លុយតាមការកំណត់របស់មន្ត្រីរដ្ឋបាលព្រៃឈើ មន្ត្រីបរិស្ថាន និងសមត្ថកិច្ចពាក់ព័ន្ធនៅក្នុងស្រុកត្រពាំងប្រាសាទ ខេត្តឧត្តរមានជ័យ ទើបមិនដែលប្រឈមនឹងការបង្ក្រាបទាល់តែសោះ។ សូម្បីតែលោក អ៊ឹម សៅវរិទ្ធ នាយខណ្ឌរដ្ឋបាលព្រៃឈើខេត្តឧត្តរមានជ័យ ក៏បណ្តោយឲ្យឈ្មួញឈ្មោះ អៀង ធ្វើសកម្មភាពដឹកជញ្ជូនឈើពីខេត្តព្រះវិហារ ឆ្លងកាត់ស្រុកត្រពាំងប្រាសាទ ខេត្តឧត្តរមានជ័យ ចូលទៅខេត្តសៀមរាប យ៉ាងរលូនផងដែរ។
ប្រភពព័ត៌មានពីប្រជាពលរដ្ឋនៅស្រុកត្រពាំងប្រាសាទ ខេត្តឧត្តរមានជ័យ បានឲ្យដឹងថា បច្ចុប្បន្នឈ្មួញឈ្មោះ អៀង ដែលមានខ្នងបង្អែករឹងមាំនៅតែធ្វើសកម្មភាពដឹកជញ្ជូនឈើប្រភេទលេខ២ តាមគោយន្តពពីខេត្តព្រះវិហារ ចូលស្រុកត្រពាំងប្រាសាទ ខេត្តឧត្តរមានជ័យ យ៉ាងរលូន។ បន្ទាប់មកឈ្មួញឈ្មោះ អៀង ដឹកជញ្ជូនឈើទាំងនោះទៅលក់ចែកចាយតាមដេប៉ូច្រើនកន្លែងនៅខេត្តសៀមរាប ព្រោះមន្ត្រីរដ្ឋបាលព្រៃឈើ និងសមត្ថកិច្ចតាមផ្លូវ មិនហ៊ានប៉ះពាល់ឈ្មួញឈ្មោះ អៀង នោះទេទំនងខ្លាចបាត់បង់ប្រភពចំណូល។
ជាក់ស្តែងលោក ជៀល សុផល នាយសង្កាត់រដ្ឋបាលព្រៃឈើត្រពាំងប្រាសាទ និងសមត្ថកិច្ចពាក់ព័ន្ធក្នុងស្រុកត្រពាំងប្រាសាទ បណ្តោយឲ្យឈ្មួញឈ្មោះ អៀង ដឹកជញ្ជូនឈើឆ្លងកាត់ស្រុកត្រពាំងប្រាសាទ ចូលទៅទឹកដីខេត្តសៀមរាប យ៉ាងសុខស្រួលតែម្តង។
តាមការបង្ហើបពីប្រភពខ្លះបានឲ្យដឹងថា លោក ជៀល សុផល នាយសង្កាត់រដ្ឋបាលព្រៃឈើត្រពាំងប្រាសាទ ដែលមានលោក អ៊ឹម សៅវរិទ្ធ នាយខណ្ឌរដ្ឋបាលខេត្តឧត្តរមានជ័យ ជាបង្អែកកំពុងចាត់ទុកឈ្មួញឈ្មោះ អៀង ជាប្រភពចំណូលមិនចេះរីងស្ងួតរបស់ខ្លួន។
ហេតុនេះហើយទើបឈ្មួញឈ្មោះ អៀង អាចដឹកជញ្ជូនឈើប្រភេទលេខ២ តាមគោយន្តពីខេត្តព្រះវិហារ ឆ្លងកាត់ស្រុកត្រពាំងប្រាសាទ ចូលទៅលក់ចែកចាយតាមដេប៉ូនៅក្នុងខេត្តសៀមរាប យ៉ាងសុខស្រួលគញមានសមត្ថកិច្ចណាប៉ះពាល់។
ប្រសិនបើគ្មានការឃុបឃិតជាប្រព័ន្ធពីសំណាក់មន្ត្រីរដ្ឋបាលព្រៃឈើ និងសមត្ថកិច្ចពាក់ព័ន្ធទេនោះ គឺឈ្មួញឈ្មោះ អៀង មិនអាចដឹកជញ្ជូនឈើខុសច្បាប់តាមអំពើចិត្តបាន។បឋម
031 33 03 888