24/11/2021
ទង្វើមិនប្រក្រតីរបស់លោក ចេង ស្រុង ក្នុងរឿងចេញប័ណ្ណកម្មសិទ្ធិដីធ្លី ចំនួន៧ប័ណ្ណឲ្យឪពុកមារបស់ខ្លួនលើទំហំដី៣០ហិកតា គ្របដណ្តប់ទៅលើព្រៃកោងកាងនៅក្នុងភូមិព្រៃសង្កែ ឃុំទឹកថ្លា ស្រុកព្រៃនប់ ខេត្តព្រះសីហនុ ត្រូវបានបណ្តាញព័ត៌មាននានាចុះផ្សាយជាបន្តបន្ទាប់។ បញ្ហានេះគឺជារឿងដែលលោក គួច ចំរើន អភិបាលខេត្តព្រះសីហនុ និងលោក ជា សុផារ៉ា ឧបនាយករដ្ឋមន្ត្រី រដ្ឋមន្ត្រីក្រសួងរៀបចំដែនដីនគរូបនីយកម្ម សំណង់ និងសុរិយោដី មិនគួរមើលរំលងតទៅទៀតទេ។ ដោយហេតុថា ទីតាំងដែលលោក ចេង ស្រុង ចេញប័ណ្ណកម្មសិទ្ធិ៧ប័ណ្ណឲ្យឪពុកមារបស់ខ្លួនយ៉ាងស្រួលៗនោះ ជាតំបន់ព្រៃកោងកាង ជាតំបន់អភិរក្សជីវចម្រុះនៅក្នុងភូមិព្រៃសង្កែ ឃុំទឹកថ្លា ស្រុកព្រៃនប់ ខេត្តព្រះសីហនុ។
តាមប្រភពពីមន្ត្រីរាជការក្នុងមន្ទីររៀបចំដែនដីខេត្តព្រះសីហនុ បានឲ្យដឹងថា មួយរយៈកន្លងទៅនេះរឿងអាស្រូវពុករលួយរបស់លោក ចេង ស្រុង ប្រធានមន្ទីររៀបចំដែនដីនគរូបនីយកម្ម សំណង់ និងសុរិយោដីខេត្តព្រះសីហនុ ត្រូវបានបណ្តាញព័ត៌មាននានាចុះផ្សាយជាបន្តបន្ទាប់រួចទៅហើយ។
បន្តែថ្នាក់ដឹកនាំក្រសួងរៀបចំដែនដី មិនទាន់ចាត់វិធានការណាមួយទៅលើលោក ចេង ស្រុង នៅឡើយទេ ហើយអង្គភាពប្រឆាំងអំពើពុករលួយដែលមានលោក ឱម យ៉ិនទៀង ជាប្រធានក៏មិនទាន់បើកការស៊ើបអង្កេតទៅលើរឿងអាស្រូវពុករលួយរបស់លោក ចេង ស្រុង នោះដែរ។ ដូច្នេះហើយទើបលោក ចេង ស្រុង ដែលជាប្រធានមន្ទីរ និងលោក សេង សុខណាក់ អនុប្រធានមន្ទីរទទួលបន្ទុកពិនិត្យឯកសាររួមសហការគ្នាប្រព្រឹត្តអំពើពុករលួយតាមច្រើនរូបភាពដោយគ្មានញញើតអ្វីទាំងអស់។
ប្រភពស្និទ្ធនឹងលោក ចេង ស្រុង បានបង្ហើបឲ្យដឹងទៀតថា ដោយសារអាងមានខ្នងបង្អែកដ៏រឹងមាំនេះហើយ ទើបលោក ចេង ស្រុង ហ៊ានចេញប័ណ្ណកម្មសិទ្ធិដីធ្លីមានភាពមិនប្រក្រតីឲ្យអ្នកមានលុយ មានអំណាចនិងឪពុកមារបស់ខ្លួនជាច្រើនប័ណ្ណដោយគ្មានខ្លាចក្រែងអ្វីទាំងអស់។
ជាងនេះទៅទៀតនៅក្នុងមន្ទីររៀបចំដែនដីខេត្តព្រះសីហនុ បច្ចុប្បន្ននេះលោក ចេង ស្រុង កំពុងពង្រឹងបណ្តាញពុករលួយរបស់ខ្លួនកាន់តែរឹងមាំ ដើម្បីប្រមូលផលប្រយោជន៍យ៉ាងសុខស្រួល ព្រោះគ្មាននរណាហ៊ានប៉ះពាល់។
ជុំវិញបញ្ហានេះលោក ឱម យ៉ិនទៀង ប្រធានអង្គភាពប្រឆាំងអំពើពុករលួយ ដែលធ្លាប់ចាត់ការលោក នួន ប៉ុក អតីតប្រធានមន្ទីររៀបចំដែនដីខេត្តព្រះសីហនុ ក្នុងសំណុំរឿងពុករលួយនោះ មិនគួរមើលរំលងអំពើពុករលួយរបស់បុគ្គល ចេង ស្រុង ។
031 33 03 888