កំពង់ចាម÷ តាមសេចក្តីរាយការណ៍ ពីប្រជាពលរដ្ឋរស់នៅក្នុងភូមិទី៥ ឃុំកងតាណឹង ស្រុកកងមាស មានបុគ្គលពីរូបទី១ ឈ្មោះ ហុក ទី២ឈ្មោះ ខ្លា ជាម្ចាស់សង្វៀនបញ្ជល់មាន់ និងអាប៉ោង លេងស៊ីសងខុសច្បាប់ កំពុងនាំបក្សពួកបើកលេងយ៉ាងពេញបន្ទុក ស្ថិតនៅចំណុចចំការស្វាយ ខាងក្រោយវត្ត កងតាណឹង ប្រហែល ២គីឡូម៉ែត្រ រីឯអាជ្ញាធរមាន សមត្ថកិច្ចពាក់ព័ន្ធ ក្នុងមូលដ្ឋាន មិនហ៊ានបង្ក្រាប ព្រោះសម្ងំទទួល ផលប្រយោជន៍ ជាថ្នូរមិនបង្ក្រាប។
មហាជនបានរិះគន់ចំៗទៅលើ ឈ្មោះ ហុក និងឈ្មោះ ខ្លាមានអំណាច ធំ ប៉ុណ្ណា បានជាហ៊ានបេីកល្បែង ប្រជល់មាន់និង អាប៉ោង ប្រឆាំង និងបទបញ្ជា របស់ក្រសួងសុខាភិបាល និងអនុសាសន៍ខ្ពង់ខ្ពស់របស់ សម្តេច តេជោ ហ៊ុន សែន បច្ចុប្បន្នកំពុងប្រកាសអោយ ប្រជាពលរដ្ឋចូលរួម ទប់ស្កាត់ជំងឺកូវីដ១៩។
ជាក់ស្ដែងនៅរសៀលថ្ងៃទី ១៥ ខែកញ្ញា ឆ្នាំ២០២១-នេះ បងប្អូនប្រជាពលរដ្ឋ បានឃើញផ្ទាល់និងភ្នែកហើយនាំគ្នាប្រាប់អ្នកសារព័ត៌មាន ឲ្យបានដឹងថា÷ មានទីតាំងបើកបទល្មើសល្បែងស៊ីសងខុសច្បាប់ មួយកន្លែងនេះកំពុងតែវង្វក់ស្មារតីឲ្យក្រុមអ្នកញៀនល្បែង នាំគ្នាចូលទៅលេងយ៉ាងគគ្រឹកគគ្រេង មើលទៅហាក់បីដូចមិនដែលចេះខ្លាចញញើតពីច្បាប់នោះឡើយ។
ប្រភពដដែលបានបន្តទៀតថា÷បច្ចុប្បន្ននេះកំពុងធ្វើឲ្យពួកគាត់មានកង្វល់និងការភ័យខ្លាចអំពីបញ្ហាខ្លាចការរីករាលដាលឆ្លងជំងឺ កូវីដ ១៩ ពីពួកអ្នកដែលមកលេងល្បែងខុសច្បាប់នៅទីកន្លែងនេះនិងភ័យខ្លាចអំពីអសន្តិសុខសង្គម ដូចជា អំពើចោរលួច ចោរឆក់ប្លន់ និងអំពើហិង្សាជាដើមជាពិសេស រីករាលដាល គ្រឿងញៀន គូរអោយកត់សម្គាល់ទៀតផង។
ប្រជាពលរដ្ឋ រស់នៅក្នុងភូមិទី៥ ឃុំកងតាណឹង ស្រុកកងមាស បានអំពាវនាវ និង ទទូចសណូមពរដល់ ឯកឧត្តម អ៊ុន ចាន់ដា អភិបាល នៃគណៈអភិបាលខេត្តកំពង់ចាម ជាពិសេស លោកឧត្តមសេនីយ៍ទោ ឯម កុសល ស្នងការនគរបាលខេត្តកំពង់ចាម និងលោកឧត្តមសេនីយ៍ត្រី សោ សាវឿន មេបញ្ជាការកងរាជអាវុធហត្ថខេត្តកំពង់ចាម គួរតែមានវិធានការ ចាត់កម្លាំងជំនាញចុះត្រួតពិនិត្យទីតាំងបើក បទល្មើសល្បែងស៊ីសងខុសច្បាប់មួយកន្លែងកំពុងដំណើរការ លេងយ៉ាងគគ្រឹកគគ្រេងនៅភូមិខាងលើនេះដើម្បីធ្វើការបង្ក្រាប តាមគោលនយោបាយភូមិ ឃុំ សង្កាត់ ឲ្យមានសុវត្ថិភាពផងទាន៕
031 33 03 888