សេចក្តីរាយការណ៍ពីប្រជាពលរដ្ឋបានឲ្យដឹងថា ទាល់តែមានការឃុបឃិតជាប្រព័ន្ធទើបឈ្មួញ អ្នកមានលុយអ្នកមានអំណាច អាចធ្វើសកម្មភាពទន្ទ្រានកាន់កាប់ដីព្រៃស្មាច់ នៅតំបន់ដងពែង ឃុំកណ្តោល ស្រុកបុទុមសាគរ តាមអំពើចិត្ត។
ក្នុងនោះមន្ត្រីបរិស្ថានប្រចាំតំបន់ប្រើប្រាស់ច្រើនយ៉ាងដងពែង ក៏ដូចជាមេឃុំកណ្តោលនិងលោក ហាក់ ឡេង អភិបាលស្រុកបុទុមសាគរ មិនអាចឆ្លើយយករួចខ្លួនបានឡើយ។ ដោយហេតុថា ត្រឹមរយៈពេល២ខែ សោះដីព្រៃស្មាច់ច្រើនរយហិកតាក្នុងឃុំកណ្តោល ស្រុកបុទុមសាគរ ខេត្តកោះកុង ត្រូវអ្នកមានលុយអ្នកមានអំណាចទន្ទ្រានកាន់កាប់យ៉ាងរលូន។
ប្រភពពីប្រជាពលរដ្ឋនៅភូមិព្រលាន និងភូមិតាំកន ឃុំកណ្តោល ស្រុកបុទុមសាគរ ខេត្តកោះកុង បានឲ្យដឹងថា ក្រុមអ្នកទន្ទ្រានកាន់កាប់ដីព្រៃស្មាច់រាប់រយហិកតានៅចំណុចដងពែង នៅតែគេចផុតពីវិធានការផ្លូវច្បាប់។ ក្រុមមន្ត្រីបរិស្ថានប្រចាំតំបន់ប្រើប្រាស់ច្រើនយ៉ាងដងពែង ក្នុងស្រុកបុទុមសាគរ មិនទាន់ត្រូវបានថ្នាក់ដឹកនាំខេត្តកោះកុង និងថ្នាក់ដឹកនាំក្រសួងពាក់ព័ន្ធ ចាត់វិធានការនៅឡើយទេ។
ប្រការនេះហើយទើបអ្នកមានលុយអ្នកមានអំណាចពីរាជធានីភ្នំពេញ អាចទៅធ្វើសកម្មភាពទន្ទ្រានកាន់កាប់ដីព្រៃស្មាច់ប្រមាណ៣០០ហិកតា ទៅ៥០០ហិកតា នៅក្នុងឃុំកណ្តោល ស្រុកបុទុមសាគរ ខេត្តកោះកុង យ៉ាងស្រួល។
ប្រជាពលរដ្ឋក្នុងឃុំកណ្តោល ស្រុកបុទុមសាគរ បានឲ្យដឹងថា បើគ្មានការបើកដៃពីមេឃុំកណ្តោល និងលោក ហាក់ ឡេង អភិបាលស្រុកបុទុមសាគរ ទេនោះគឺសកម្មភាពទន្ទ្រានកាន់កាប់ដីព្រៃស្មាច់ នៅតំបន់ដងពែង មិនអាចកើតឡើងបានទេ។
ក្រុមឈ្មួញដែលធ្វើសកម្មភាពបំផ្លាញព្រៃស្មាច់ យ៉ាងមហន្តរាយនៅឃុំកណ្តោល ត្រូវបានមន្ត្រីអាជ្ញាធរថ្នាក់ឃុំថ្នាក់ស្រុក ស្គាល់អត្តសញ្ញាណយ៉ាងច្បាស់ប៉ុន្តែមន្ត្រីអាជ្ញាធរបែរជាមិនហ៊ានចាត់ការពួកគេឡើយ។ ដូច្នេះលោកស្រី មិថុនា ភូថង អភិបាលខេត្តកោះកុង គួរពិនិត្យឡើងវិញជាបន្ទាន់ព្រោះរយៈពេល២ខែកន្លងទៅនេះដីព្រៃស្មាច់ប្រមាណ៣០០ ទៅ៥០០ហិកតា ត្រូវបានវិនាសអស់ទៅហើយ ។ បឋម
031 33 03 888