ថ្មីៗនេះរឿងអាស្រូវនិងអំពើពុករលួយច្រើនបែបច្រើនយ៉ាងរបស់លោក ឃុន ប៊ុនហូ មេបញ្ជាការរងកងរាជអាវុធហត្ថខេត្តកំពង់ធំ ត្រូវបានជ្រួតជ្រាបដល់មេៗនៅខាងលើហើយ ក្រោយពេលបណ្តាញព័ត៌មាននានាចុះផ្សាយជាបន្តបន្ទាប់។ ដូច្នេះទោះបីលោក ឃុន ប៊ុនហូ មិនអាចបិទបាំងទង្វើរបស់ខ្លួនបានឡើយ ព្រោះរបាយការណ៍ប្រមាណ៣០ទំព័រ ជុំវិញអំពើពុករលួយនិងរឿងអាស្រូវរបស់លោក ឃុន ប៊ុនហូ ត្រូវបានបណ្តាញព័ត៌មាននានាដកស្រង់យកមកផ្សព្វផ្សាយជាសាធារណៈ។ ហេតុនេះហើយទើបមជ្ឈដ្ឋាននានារំពឹងទុកថា ថ្នាក់ដឹកនាំកងរាជអាវុធហត្ថលើផ្ទៃប្រទេស នឹងចាត់ការទៅលើលោក ឃុន ប៊ុនហូ មេបញ្ជាការរងកងរាជអាវុធហត្ថខេត្តកំពង់ធំ ក្នុងពេលឆាប់ៗខាងមុខនេះជាមិនខាន។
បើតាមប្រភពពីមន្ត្រីកងរាជអាវុធហត្ថក្នុងទីបញ្ជាការកងរាជអាវុធហត្ថខេត្តកំពង់ធំ មួយចំនួនបានឲ្យដឹងថា ការដែលលោក ឃុន ប៊ុនហូ មេបញ្ជាការរងកងរាជអាវុធហត្ថខេត្តកំពង់ធំ អាចធ្វើអ្វីៗតាមអំពើចិត្តគឺដោយសារមានការបើកដៃពីសំណាក់លោកឧត្តមសេនីយ៍ត្រី ហង្ស ថុល មេបញ្ជាការកងរាជអាវុធហត្ថខេត្តកំពង់ធំ ផងដែរ។ ប្រសិនបើគ្មានលោក ហង្ស ថុល ជាបង្អែកទេនោះគឺលោក ឃុន ប៊ុនហូ មេបញ្ជាការរងកងរាជអាវុធហត្ថខេត្តកំពង់ធំ មិនហ៊ានប្រើតួនាទីនិងអំណាចរបស់ខ្លួនប្រមូលលុយតាមអំពើចិត្តឡើយ។
ឥឡូវនេះរឿងអាស្រូវនិងអំពើពុករលួយរបស់លោក ឃុន ប៊ុនហូ មេបញ្ជាការរងកងរាជអាវុធហត្ថខេត្តកំពង់ធំ ត្រូវបានលាតត្រដាងជាបន្តបន្ទាប់ ហើយលោក ហង្ស ថុល ត្រូវបានគេដឹងថា ជាអ្នកបណ្តោយឲ្យលោក ឃុន ប៊ុនហូ ធ្វើអ្វីៗតាមអំពើចិត្តរបស់ខ្លួនយ៉ាងងងើល។
បើតាមរបាយការណ៍ប្រមាណ៣០ទំព័រ ដែលមន្ត្រីអាវុធហត្ថខេត្តកំពង់ធំ បញ្ជូនទៅថ្នាក់លើគឺបានលាតត្រដាងយ៉ាងច្បាស់ក្រឡែតរបស់លោក ឃុន ប៊ុនហូ មេបញ្ជាការរងកងរាជអាវុធហត្ថខេត្តកំពង់ធំ តែម្តង។
ក្នុងនោះករណីលោក ឃុន ប៊ុនហូ ចាត់តាំងកម្លាំងរបស់ខ្លួនឲ្យប្រមូលលុយពីក្រុមឈ្មួញដឹកជញ្ជូនឈើពីតំបន់ព្រៃឡង់ខេត្តកំពង់ធំ និងប្រមូលពីក្រុមឈ្មួញដឹកជញ្ជូនឈើពីខេត្តព្រះវិហារ ឆ្លងកាត់ផ្លូវជាតិលេខ៦២ ចូលខេត្តកំពង់ធំ ក៏ត្រូវបានលាតត្រដាងផងដែរ។ មានន័យថា អំពើពុករលួយច្រើនបែបច្រើនយ៉ាងរបស់លោក ឃុន ប៊ុនហូ មេបញ្ជាការរងកងរាជអាវុធហត្ថខេត្តកំពង់ធំ និងបក្ខពួកគឺជារឿងមិនអាចបិទបាំងបានឡើយ។
ជុំវិញបញ្ហាខាងលើនេះអត្តសញ្ញាណមន្ត្រីអាវុធហត្ថខេត្តកំពង់ធំ ដែលជាបក្ខពួករបស់លោក ឃុន ប៊ុនហូ មេបញ្ជាការរងកងរាជអាវុធហត្ថខេត្តកំពង់ធំ ហើយជាប់ពាក់ព័ន្ធនឹងអំពើពុករលួយក៏ត្រូវបានបង្ហាញអត្តសញ្ញាណផងដែរ។
ជាពិសេសលោក ហង្ស ថុល មេបញ្ជាការកងរាជអាវុធហត្ថខេត្តកំពង់ធំ មិនអាចគេចវេះពីការទទួលខុសត្រូវបានឡើយ ព្រោះលោក ហង្ស ថុល ជាអ្នកបើកដៃឲ្យលោក ឃុន ប៊ុនហូ មេបញ្ជាការរងកងរាជអាវុធហត្ថខេត្តកំពង់ធំ ធ្វើអ្វីតាមអំពើចិត្តហើយមានការបែងចែកផលប្រយោជន៍តាមលំដាប់លំដោយ។
ហេតុនេះថ្នាក់ដឹកនាំកងរាជអាវុធហត្ថលើផ្ទៃប្រទេស មិនគួរទុកឲ្យមន្ត្រីអាវុធហត្ថដូចជាលោក ហង្ស ថុល និងលោក ឃុន ប៊ុនហូ សាងភាពល្បីល្បាញខាងពុករលួយ និងបក្ខពួកនិយមយ៉ាងពេញបន្ទុកតទៅទៀតទេ៕