ប្រភពស្និទ្ធនឹងលោកឧត្តមសេនីយ៍ទោ ទិត្យ ណារ៉ុង ស្នងការនគរបាលខេត្តសៀមរាប បានឲ្យដឹងថាបើគ្មានការបើកដៃពីលោក ទិត្យ ណារ៉ុង ទេនោះគឺលោក ម៉ក់ ធារ៉ា លោក ជ្រិញ គឹមនី លោក ម៉េង សំណាង លោក ហេង ហឿយ និងលោក សុខ ភិរម្យ មិនហ៊ានប្រើអំណាចនិងតួនាទីប្រមូលលុយតាមរបៀបពុករលួយដូចបច្ចុប្បន្ននេះទេ។
ប្រភពបានបញ្ជាក់ទៀតថា ក្រុមឈ្មួញដឹកជញ្ជូនទំនិញគេចពន្ធពីច្រកព្រំដែនខ្មែរ-សៀមក្នុងខេត្តបន្ទាយមានជ័យនិងខេត្តឧត្តរមានជ័យចូលមកខេត្តសៀមរាបឬឆ្លងកាត់ខេត្តសៀមរាប ជាប្រភពចំណូលរបស់មេៗនគរបាលប្រឆាំងបទល្មើសសេដ្ឋកិច្ចខេត្តសៀមរាប។ រីឯក្រុមឈ្មួញដឹកជញ្ជូនទំនិញគេចពន្ធពីច្រកព្រំដែនខ្មែរ-យួនខេត្តត្បូងឃ្មុំ ចូលមកខេត្តសៀមរាបក៏ជាប្រភពចំណូលដ៏សំខាន់របស់មេៗនគរបាលប្រឆាំងបទល្មើសសេដ្ឋកិច្ចខេត្តសៀមរាបដែរ។ លើសនេះទៅទៀតក្រុមឈ្មួញដឹកជញ្ជូនឈើខុសច្បាប់ និងឈ្មួញធ្វើអាជីវកម្មរណ្តៅដីនិងធនធានរ៉ែផ្សេងៗ ត្រូវតែបង់លុយតាមការកំណត់របស់មេៗនគរបាលប្រឆាំងបទល្មើសសេដ្ឋកិច្ចខេត្តសៀមរាប ដែលល្បីល្បាញខាងពុករលួយ។
ថ្មីៗនេះរឿងអាស្រូវពុករលួយជាប្រព័ន្ធរបស់មេៗនគរបាលប្រឆាំងបទល្មើសសេដ្ឋកិច្ចនៃស្នងការដ្ឋាននគរបាលខេត្តសៀមរាប ត្រូវបានបណ្តាញព័ត៌មាននានាចុះផ្សាយជាបន្តបន្ទាប់ដើម្បីឲ្យថ្នាក់ដឹកនាំក្រសួងនិងស្ថាប័នពាក់ព័ន្ធបានជ្រួតជ្រាបហើយចាត់វិធានការទប់ស្កាត់។
ជុំវិញបញ្ហានេះបើតាមការបង្ហើបពីមន្ត្រីនគរបាលនៅក្នុងស្នងការដ្ឋាននគរបាលខេត្តសៀមរាប មួយចំនួនបានលើកឡើងថា បើគ្មានការបើកដៃពីសំណាក់លោកឧត្តមសេនីយ៍ទោ ទិត្យ ណារ៉ុង ស្នងការនគរបាលខេត្តសៀមរាប ទេនោះគឺមេៗនគរបាលប្រឆាំងបទល្មើសសេដ្ឋកិច្ចខេត្តសៀមរាប មិនហ៊ានធ្វើអ្វីៗតាមអំពើចិត្តឡើយ។ ហេតុនេះនាយឧត្តមសេនីយ៍ នេត សាវឿន អគ្គស្នងការនគរបាលជាតិ គួរពិនិត្យឡើងវិញជាបន្ទាន់ព្រោះលោកឧត្តមសេនីយ៍ទោ ទិត្យ ណារ៉ុង ស្នងការនគរបាលខេត្តសៀមរាប បណ្តោយឲ្យមន្ត្រីក្រោមឱវាទប្រព្រឹត្តអំពើពុករលួយពេញទំហឹង។
ប្រភពពីមន្ត្រីនគរបាលក្នុងស្នងការដ្ឋាននគរបាលខេត្តសៀមរាប បានឲ្យដឹងថាលោកឧត្តមសេនីយ៍ត្រី ម៉ក់ ធារ៉ា ស្នងការរងទទួលផែនការិយាល័យនគរបាលប្រឆាំងបទល្មើសសេដ្ឋកិច្ចនិងមន្ត្រីក្រោមឱវាទច្រើននាក់ទៀតឃុបឃិតគ្នាប្រព្រឹត្តអំពើពុករលួយ។ ប្រភពបានឲ្យដឹងទៀតថាលោក ម៉ក់ ធារ៉ា និងលោកវរសេនីយ៍ឯក ជ្រិញ គឹមនី នាយការិយាល័យប្រឆាំងបទល្មើសសេដ្ឋកិច្ចព្រមទាំងលោកវរសេនីយ៍ទោ ម៉េង សំណាង នាយរងការិយាល័យប្រឆាំងបទល្មើសសេដ្ឋកិច្ច រួមដៃគ្នាប្រព្រឹត្តអំពើពុករលួយពេញទំហឹង។
ទន្ទឹមនឹងនេះ លោកវរសេនីយ៍ទោ ហេង ហឿយ នាយរងការិយាល័យទទួលបន្ទុកទំនេញគេចពន្ធនិងលោកវរសេនីយ៍ត្រី សុខ ភិរម្យ នាយរងការិយាល័យទទួលបន្ទុកត្រួតពិនិត្យខាងធនធានរ៉ែ ក៏ល្បីល្បាញខាងពុករលួយដែរ។បឋម