(ខេត្ដមណ្ឌលគិរី) ៖ ក្រោយទទួលបានព័ត៌មានពីប្រជាពលរដ្ឋបង្ហើបថា មានគំនរឈើដែលមានម្ចាស់ឈ្មោះ រិទ្ធ ជាឈ្មួញឈើដ៏សកម្មនៅខេត្ដមណ្ឌលគិរី កម្លាំងអាវុធហត្ថបានសហការជាមួយមេព្រៃ ចុះប្រមូលឈើបានជាច្រើនម៉ែត្រគូប ប៉ុន្ដែមិនចាប់បានម្ចាស់នោះទេ។
ប្រតិបត្ដិការបង្ក្រាបនេះ ធ្វើឡើងកាលពីថ្ងៃទី១៥ ខែឧសភា ឆ្នាំ២០២១ ស្ថិតនៅត្រង់ចំណុចភូមិពូលូង សង្កាត់រមនា ក្រុងមនោរម្យ ខេត្ដមណ្ឌលគិរី។ ការបង្ក្រាបនេះ ជាស្នាដៃរលោក អឹម រស់អៀង អាវុធហត្ថក្រុង ក្រោមការចង្អុលបង្ហាញពីឯកឧត្ដម ហែម ប៊ុនណារ៉ែល និងមានការចូលរួមសហការពីលោកមេព្រៃ លោក ចំរើន។
ខណៈពេលនៃការបង្ក្រាប ជាលទ្ធផលជាក់ស្ដែងកម្លាំងជំនាញប្រមូលបានគំនរឈើ ជាច្រើនដែលឈ្មួញយកមកលាក់ទុក ឈើនោះមានចំនួន១២ដុំ ហើយមានមុខ៤០ មុខ៥០ ប្រវែងឈើ៣ ម៉ែត្រទៅ៣ម៉ែត្រ ខ្លះជាប្រភេទឈើសុក្រំ។
បើតាមសមត្ថកិច្ចបង្ហើបឲ្យដឹងថា ចំពោះឈើត្រូវស្ដុកទុកនៅរដ្ឋបាលព្រៃឈើ ឯជនសង្ស័យសមត្ថកិច្ចនឹងបន្ដស្វែងរកបន្ថែមទៀត ដោយមិនលើកលែងឡើយ។ គំនរឈើដ៏ច្រើនបែបនេះ ត្រូវបានប្រជាពលរដ្ឋបង្ហើបថា ជារបស់ឈ្មួញឈើម្នាក់ឈ្មោះ រិទ្ធ ។
បច្ចុប្បន្នឈើទាំងនោះត្រូវបានសមត្ថកិច្ចប្រគល់ទៅរដ្ឋបាលព្រៃឈើក្រុងមនោរម្យ ដើម្បីចាត់ការបន្ដតាមនីតិវិធីច្បាប់៕
031 33 03 888