សេចក្តីរាយការណ៍ពីប្រជាសហគមន៍ការពារព្រៃឡង់ ឃុំមានរិទ្ធ បានឲ្យដឹងទៀងថា មួយរយៈនេះឈ្មួញឈ្មោះ ហ៊ា និងប្រពន្ធឈ្មោះ ហ័នធ្វើសកម្មភាពដឹកជញ្ជូនឈើចេញពីព្រៃឡង់ តាមច្រកតោល យ៉ាងពេញបន្ទុកព្រោះអាងមានលោក សំ សាង ជាបង្អែករឹងមាំ។ ហេតុនេះលោក សុខ លូ អភិបាលខេត្តកំពង់ធំ និងលោក សាយ សំអាល់ រដ្ឋមន្ត្រីក្រសួងបរិស្ថាន ក្នុងពិនិត្យឡើងវិញជាបន្ទាន់ ហើយចាត់វិធានការទប់ស្កាត់បទល្មើសព្រៃឈើនៅក្នុងតំបន់ព្រៃឡង់ ឃុំមានរិទ្ធ ស្រុកសណ្តាន់ ប្រកបដោយប្រសិទ្ធភាព។ ជាពិសេសលោក សាយ សំអាល់ រដ្ឋមន្ត្រីក្រសួងបរិស្ថាន មិនគួរជឿតាមរបាយការណ៍ភូតភររបស់លោក តុប កក្កដា ប្រធានមន្ទីរបរិស្ថានខេត្តកំពង់ធំ ព្រមទាំងក្រុមមន្ត្រីបរិស្ថានប្រចាំតំបន់ព្រៃឡង់ ខេត្តកំពង់ធំនោះទេ។
ប្រភពពីប្រជាសហគមន៍ការពារព្រៃឡង់ក្នុងឃុំមានរិទ្ធ ស្រុកសណ្តាន់ ខេត្តកំពង់ធំ បានឲ្យដឹងថា បច្ចុប្បន្នលោក សំ សាង ប្រធានស្នាក់ការបរិស្ថាននៅចំណុចច្រកតោល ជាអ្នកបើកដៃឲ្យឈ្មួញឈ្មោះ ហ៊ា និងប្រពន្ធឈ្មោះ ហ័ន ប្រមូលទិញឈើដឹកចេញពីព្រៃឡង់យ៉ាងពេញបន្ទុកដើម្បីផលប្រយោជន៍ផ្ទាល់ខ្លួន។
ប្រភពបានឲ្យដឹងទៀតថា បើគ្មានការបើកដៃពីលោក សំ សាង ទេនោះគឺឈ្មួញឈើឈ្មោះ ហ៊ា និងប្រពន្ធឈ្មោះ ហ័ន ដែលរស់នៅក្នុងភូមិអូរពកសាមគ្គី ឃុំមានរិទ្ធ ស្រុគសណ្តាន់ មិនអាចដឹកជញ្ជូនឈើចេញពីតំបន់ព្រៃឡង់បានទេ។ រីឯលោក តុប កក្កដា ប្រធានមន្ទីរបរិស្ថានខេត្តកំពង់ធំ កំពុងបណ្តោយឲ្យលោក សំ សាង ប្រធានស្នាក់ការបរិស្ថានឈរជើងនៅចំណុចច្រកតោលតំបន់ព្រៃឡង់ ឃុំមានរិទ្ធ ធ្វើអ្វីៗតាមអំពើចិត្តតែម្តង ប្រហែលមានជាប់ពាក់ព័ន្ធផលប្រយោជន៍។
មន្ត្រីអង្គការក្រៅរដ្ឋាភិបាលដែលឃ្លាំមើលបទល្មើសព្រៃឈើក្នុងខេត្តកំពង់ធំ បានលើកឡើងថា បើគ្មាការបើកដៃពីលោក តុប កក្កដា ប្រធានមន្ទីរបរិស្ថានខេត្តកំពង់ធំ ទេនោះគឺមន្ត្រីបរិស្ថានប្រចាំតំបន់ព្រៃឡង់ស្រុកសណ្តាន់ ជាពិសេសលោក សំ សាង ប្រធានស្នាក់ការបរិស្ថានចំណុចច្រកតោល មិនហ៊ានធ្វើអ្វីៗតាមអំពើចិត្តឡើយ។
ទាល់តែមានការបើកដៃពីសំណាក់លោក តុប កក្កដា ទើបលោក សំ សាង ហ៊ានសម្រួលឲ្យឈ្មួញឈ្មោះ ហ៊ា និងប្រពន្ធឈ្មោះ ហ័ន ដឹកជញ្ជូនឈើចេញពីព្រៃឡង់ យ៉ាងសុខស្រួលហើយប្រមូលលុយដាក់ហោប៉ៅយ៉ាងត្រជាក់ចិត្ត។
ជាងនេះទៅទៀតព្រៃអង់តែនក្នុងស្រុកសន្ទុក ខេត្តកំពង់ធំ ក៏កំពុងប្រឈមនឹងសេចក្តីវិនាសនាពេលឆាប់ៗខាងមុខចៀសមិនផុតឡើយ ព្រោះមានការឃុបឃិតបើកដៃពីមន្ត្រីបរិស្ថាននិងសមត្ថកិច្ចពាក់ព័ន្ធដែលគិតតែផលប្រយោជន៍ផ្ទាល់ខ្លួន។
031 33 03 888