ភ្នំពេញ ៖ អ្នកនាំពាក្យអគ្គស្នងការដ្ឋាននគរបាលជាតិ លោកឧត្តមសេនីយ៍ឯក ឆាយ គឹមខឿន បានថ្លែងប្រាប់អ្នកសារព័ត៌មានថា “មានការផ្ទុះអាវុធ សមត្ថកិច្ចបានប្រើសិទ្ធិការពារខ្លួនបានបាញ់ស្លាប់បាត់ហើយ នៅភូមិអូរគគីរ ខេត្តក្រចេះ”។
ខ្មាន់កាំភ្លើងដែលបាញ់សម្លាប់នាយរងការិយាល័យនគរបាលព្រហ្មទណ្ឌកម្រិតស្រាលរាជធានីភ្នំពេញ ខណៈមានការប៉ះទង្គិចគ្នាមួយប្រាវជាមួយសមត្ថកិច្ច ហើយក៏ត្រូវបានសមត្ថកិច្ចបាញ់សម្លាប់ កាលពីព្រលប់ថ្ងៃទី១៥ ខែមករា ឆ្នាំ២០២១ នៅ ភ្នំខៀវ, ភូមិអូរព្រះ, ឃុំអូរគ្រៀង ស្រុក សំបូរ នៃខេត្តក្រចេះ ។ ការបាញ់ស្លាប់ខ្មាន់កាំភ្លើង គឺសមត្ថកិច្ចប្រើសិទ្ធិការពារខ្លួន។
ខ្មាន់កាំភ្លើងឈ្មោះ អ៊ា ណារ៉េន អាយុ ៣៨ឆ្នាំ មានទីលំនៅផ្ទះលេខ B9 ផ្លូវបេតុងបុរីទឹម សាខន ស្ថិតនៅក្នុងភូមិតាកេរ សង្កាត់កំបូល ខណ្ឌកំបូល រាជធានីភ្នំពេញ។
គួរបញ្ជាក់ថា ខ្មាន់កាំភ្លើងឈ្មោះ អ៊ា ណារ៉េន កាលពីយប់រំលងអាធ្រាតឈានចូលថ្ងៃទី៣០ ខែធ្នូ ឆ្នាំ២០២០ បានបាញ់សម្លាប់មន្ត្រីនគរបាលក្នុងរឿងទំនាស់គ្រោះថ្នាក់ចរាចរណ៍នៅចំណុចមុខផ្ទះសំណាក់ សាំងហ័រទៀន លើផ្លូវសហព័ន្ធរុស្សី ស្ថិតនៅភូមិក្បាលដំរី២ សង្កាត់កាកាប២ ខណ្ឌពោធិ៍សែនជ័យ រាជធានីភ្នំពេញ។
បន្ទាប់ពីបង្កហេតុជនសង្ស័យបានបើករថយន្តម៉ាក Lexus RX300 ពណ៌ខ្មៅ ពាក់ផ្លាកលេខ សៀមរាប 2A-4546 គេចចេញពីកន្លែកើតហេតុ ។ សមត្ថកិច្ចចុះធ្វើស្រាវជ្រាវស្វែងរកជនសង្ស័យ នៅព្រឹកថ្ងៃដដែលសកមត្ថកិច្ចបានរកឃើញរថយន្ត ជនសង្ស័យ០១ គ្រឿង ម៉ាកLexus RX300 ពណ៌ខ្មៅដោះស្លាកលេខចោល យកទៅប្លុងចតចោលនៅចំណុចផ្ទះគ្មានលេខ ផ្លូវ ៤២ ភូមិស្វាយឧត្តម សង្កាត់ពន្សាំង ខណ្ឌព្រែកព្នៅ និងបានសាកសួរម្ចាស់ផ្ទះ ហើយឈានទៅដល់ការស្វែងរកចាប់ខ្លួនជនសង្ស័យ០នាក់ បក្ខពួកឃាតករដែលបានរត់គេចដល់ខេត្តបាត់ដំបង ហើយបានបញ្ជូនជនសង្ស័យរូបនេះ មកកាន់ការិយាល័យនគរបាលព្រហ្មទណ្ឌមកម្រិតធ្ងន់រាជធានីភ្នំពេញ ដើម្បីធ្វើការសាកសួរ។
ក្រោយការសាកសួរជនសង្ស័យឈ្មោះ កែ ចាន់មាន បានសារភាពថា ក្រុមខ្លួនពិតជាបានចូលរួម ក្នុងសកម្មភាពបាញ់សម្លាប់ជនរងគ្រោះពិតប្រាកដមែន ដោយឈ្មោះ អ៊ា ណារ៉េន ហៅ រ៉េនជាឃាតករ(គេចខ្លួន) ជាអ្នកបាញ់ សម្លាប់ជនរងគ្រោះ។
ចំណែករូបគេជាអ្នកបើករថយន្តរត់គេច ទៅលាក់ទុកនៅផ្ទះប្រជាពលរដ្ឋក្បែរភ្នំបាសិត ហើយឈ្មោះ អ៊ា ណារ៉េន ជាឃាតករក៏បានតេទូរស័ព្ទបក្ខពួកម្នាក់ទៀតយកម៉ូតូមកឌុបពួកខ្លួនឆ្លងស្ពានព្រែក្តាមទៅផ្ទះសំណាក់មិនចាំយីហោដេកចំនួន ០២យប់ ទើបបន្ទាប់មកពួកគេក៏បែកគ្នារៀងៗខ្លួន។ ហើយរូបគេ(កែ ចាន់មាន )មកលាក់ខ្លួននៅក្នុងវត្តមួយនៃខណ្ឌព្រែកព្នៅ ១យប់។ លុះដល់ថ្ងៃទី២ ខែមករា ឆ្នាំ២០២១ ខ្លួនក៏បានបន្តដំណើរទៅខេត្តបាត់ដំបង ដោយស្នាក់នៅបន្ទប់ជួល ម្តុំវត្តទួលតាឯក ខេត្តបាត់ដំបង ។ លុះដល់ថ្ងៃទី ៣ ខែមករា ឆ្នាំ២០២១ ពេលខ្លួនកំពុងដេកនៅផ្ទះជួលក៏ត្រូវបានសមត្ថកិច្ចធ្វើការឃាត់ខ្លួនតែម្តង។
ក្រោយប្រតិបត្តិការស្រាវជ្រាវដោយដោយនគរបាលព្រហ្មទណ្ឌ និងនគរបាលមូលដ្ឋាន រហូតដល់រសៀលថ្ងៃទី០៣ ខែមករា ឆ្នាំ២០២១ កម្លាំងនាយកដ្ឋាននគរបាលព្រហ្មទណ្ឌ បានចាប់ខ្លួនបានជនសង្ស័យម្នាក់ ដែលជាបក្ខពួករបស់ខ្មាន់កាំភ្លើង ហើយជាអ្នកបើករថយន្ដនៅថ្ងៃបង្កហេតុ។
បក្ខពួករបស់ខ្មាន់កាំភ្លើងម្នាក់នេះឈ្មោះ កែ ចាន់មាន ដែលត្រូវបានលោក ឆាយ ហុង ព្រះរាជអាជ្ញារង នៃអយ្យការអមសាលាដំបូងរាជធានីភ្នំពេញ ចោទប្រកាន់ចំនួនពីរបទល្មើស រួមមាន៖ សមគំនិតក្នុងអំពើឃាតកម្ម និងជួញដូរគ្រឿងញៀន ហើយត្រូវបានតុលាការឃុំខ្លួនជាបណ្តោះអាសន្ន៕
031 33 03 888