ប្រភពដែលស្និទ្ធនឹងលោក ណុប សំអាន ប្រធានការិយាល័យគយ ច្រកទំនប់រលក បានឲ្យដឹងថា លោក ណុប សំ អាន ចំណាយដើមទុនយ៉ាងច្រើន សម្រាប់តំណែងមួយនេះ ដូច្នេះហើយទើបគាត់ខំប្រឹង ប្រមូលលុយតាម របៀបពុករលួយច្រើនរូបភាព ជាពិសេសការឃុបឃិតបើកដៃឲ្យឈ្មួញនាំចូលទំនិញគេចពន្ធ ទំនិញបង់ពន្ធមិនគ្រប់ និងទំនិញខុសច្បាប់ទាំងយប់ទាំងថ្ងៃ។ ប្រភពបានឲ្យដឹងទៀតថា ទំនិញដែលឈ្មួញនាំចូលតាមច្រកទំនប់រលក បង់ពន្ធចូលរដ្ឋត្រឹម២៥ឬ៣០ភាគរយប៉ុណ្ណោះ ក្រៅពីនេះគឺមានការបែងចែកផលប្រយោជន៍លើតុក្រោមតុ ជាមួយលោក ណុប សំអាន និងលោក ផាត់ សំណាង យ៉ាងសុខស្រួល។ បច្ចុប្បន្នឈ្មួញនាំចូលទំនិញគេចពន្ធ និងទំនិញខុសច្បាប់ច្រើនជាងគេ គឺឈ្មួញឈ្មោះ ចិត្រ ដែលជាសាច់ញាតិមន្ត្រីយោធាជាន់ខ្ពស់មានអំណាចខ្លាំង ហើយគ្មាននរណាហ៊ានប៉ះពាល់។
ប្រភពពីសមត្ថកិច្ចពាក់ព័ន្ធនៅច្រកទំនប់រលក ក្រុងព្រះសីហនុ ខេត្តព្រះសីហនុ បានឲ្យដឹងថា បច្ចុប្បន្នលោក ណុប សំអាន ប្រធានការិយាល័យគយច្រកទំនប់រលក និងលោក ផាត់ សំណាង អនុប្រធានការិយាល័យគយច្រកទំនប់រលក ឃុបឃិតគ្នាបើកដៃឲ្យឈ្មួញនាំចូលទំនិញគេចពន្ធ ទំនិញបង់ពន្ធមិនគ្រប់ និងទំនិញខុសច្បាប់កាន់តែច្រើនឡើងៗ។ ប្រភពបានឲ្យដឹងទៀតថា ឈ្មួញដែលសម្រុកនាំចូលទំនិញគេចពន្ធ ទំនិញខុសច្បាប់ និងទំនិញបង់ពន្ធមិនគ្រប់តាមច្រកទំនប់រលក មានដូចជា ឈ្មោះ ចិត្រ, ឈ្មោះ តាធី, ឈ្មោះ ចែរ៉ា និងឈ្មោះ ចែរី ជាដើមដោយសារមានការឃុបឃិតបើកដៃពីសំណាក់លោក ណុប សំអាន និងលោក ផាត់ សំណាង ដែលល្បីល្បាញខាងពុករលួយ។ ការដែលលោក ណុប សំអាន និងលោក ផាត់ សំណាង ហ៊ានធ្វើអ្វីៗតាមអំពើចិត្តគឺមានការឃុបឃិតបើកដៃពីសំណាក់មេគយធំៗក្នុងខេត្តព្រះសីហនុ ដែលកំពុងប្រមូលលុយស្រង់ដើមយ៉ាងតក់ក្រហល់។
មន្ត្រីគយនិងភ្នាក់ងារគយក្នុងខេត្តព្រះសីហនុ មួយចំនួនបានអំពាវនាវឲ្យលោក អូន ព័ន្ធមុនីរ័ត្ន ដែលជារដ្ឋមន្ត្រីក្រសួងសេដ្ឋកិច្ចនិងហិរញ្ញវត្ថុ ចាត់វិធានការទប់ស្កាត់អំពើពុករលួយរបស់លោក ណុប សំអាន និងលោក ផាត់ សំណាង ខ្លះផងព្រោះពួកគេឃុបឃិតគ្នាបំផ្លាញចំណូលពន្ធរដ្ឋដោយគ្មានខ្លាចក្រែងអ្វីទាំងអស់។ ប្រភពបានឲ្យដឹងទៀតថា មេឈ្មួញ ហាក់ ម៉ៅ គឺជាអ្នកម៉ៅការដឹកជញ្ជូនទំនិញចេញពីច្រកទំនប់រលក យ៉ាងរលូនគ្មានសមត្ថកិច្ចណាហ៊ានប៉ះពាល់ឡើយ ក្នុងខណៈដែលលោក ផាត់ សំណាង ជាអនុប្រធានការិយាល័យគយច្រកទំនប់រលក តម្រូវឲ្យឈ្មួញបង់ថ្លៃក្បាលរថយន្ត១គ្រឿងពី៣០០ទៅ៥០០ដុល្លារ ហើយគ្មានឈ្មួញណាអាចតវ៉ាបានទេ។ លើសនេះទៅទៀតសម្រាប់ទំនិញមួយរថយន្តដែលឈ្មួញដឹកចេញពីខេត្តទំនប់រលក ត្រូវបង់លុយក្នុងមួយឯកសារពី៧០ដុល្លារទៅ១០០ដុល្លារ បើមិនដូច្នេះទេឈ្មួញត្រូវប្រឈមនឹងការលំបាកជាមិនខាន។
031 33 03 888