ប្រភពពីកម្មករនៅក្នុងក្រុមហ៊ុនទំនប់ វារីអគ្គិសនីសេសានក្រោម២ បានឲ្យដឹងថា មួយរយៈ ចុងក្រោយនេះបទ ល្មើស កាប់ឈើនិងដឹកជញ្ជូន ឈើពីព្រៃការពារ ព្រៃអភិរក្ស ចូលទៅក្នុងទីតាំងបាតអាងទំ នប់វារីអគ្គិសនី សេសានក្រោម២ កំពុងកើតឡើងយ៉ាងគំហុក។ ឈើទាំងនោះត្រូវបានគេអារច្រៀកហើយដឹកជញ្ជូនតាមរថយន្តធំៗចំណុះពី៨០តោន ទៅ១០០តោនចេញទៅស្រុកយួនតាមច្រកត្រពាំងស្រែ ក្នុងស្រុកស្នួល ខេត្តក្រចេះ យ៉ាងរលូនដោយគ្មានមន្ត្រីជំនាញឬសមត្ថកិច្ចពាក់ព័ន្ធណាហ៊ានប៉ះពាល់ទាល់តែសោះ។ ដូច្នេះថ្នាក់ដឹកនាំក្រសួងបរិស្ថាន និងថ្នាក់ដឹកនាំក្រសួងកសិកម្ម គួរពិនិត្យឡើងវិញជាបន្ទាន់ព្រោះបច្ចុប្បន្ននេះឈ្មួញឈ្មោះ ម៉ឹក សុផាន់ណារ៉េត ហៅឧកញ៉ា ជ័យ នៅតែបន្តសកម្មភាពកាប់ឈើ ដឹកជញ្ជូនឈើពីស្រុកសេសាន ខេត្តស្ទឹងត្រែង ចេញទៅស្រុកយួនតាមច្រកត្រពាំងស្រែ ក្នុងស្រុកស្នួល ខេត្តក្រចេះ ដោយគ្មានញញើតអ្វីទាំងអស់។
មន្ត្រីរដ្ឋបាលព្រៃឈើនិងសមត្ថកិច្ចពាក់ព័ន្ធក្នុងខេត្តស្ទឹងត្រែង ក៏ដូចជាខេត្តក្រចេះ មិនហ៊ានប៉ះពាល់សកម្មភាពដឹកជញ្ជូនឈើរបស់ឈ្មួញឈ្មោះ ម៉ឹក សុផាន់ណារ៉េត ហៅឧកញ៉ា ជ័យ នោះឡើយព្រោះគេដឹងថាខ្នងបង្អែករបស់ឧកញ៉ា ជ័យ គឺជាអ្នកមានឥទ្ធិពលខ្លាំងជាងរដ្ឋមន្ត្រីក្រសួងបរិស្ថាន និងក្រសួងកសិកម្មទៅទៀត។
ប្រភពពីប្រជាពលរដ្ឋរស់នៅក្នុងស្រុកសេសាន ខេត្តស្ទឹងត្រែង បានឲ្យដឹងថា រហូតមកដល់ពេលនេះព្រៃឈើដែលនៅខាងក្រៅតំបន់បាតអាងទំនប់វារីអគ្គិសនីសេសានក្រោម២ កំពុងប្រឈមនឹងការបំផ្លាញយ៉ាងមហន្តរាយព្រោះគ្មានមន្ត្រីជំនាញឬសមត្ថកិច្ចពាក់ព័ន្ធណាចាត់វិធានការទប់ស្កាត់ឡើយ។
ប្រជាសហគមន៍ការពារព្រៃឈើនៅតំបន់ក្បែរបាតអាងទំនប់វារីអគ្គិសនីសេសានក្រោម២ បានឲ្យដឹងថា ឈ្មួញឈ្មោះ ម៉ឹក សុផាន់ណារ៉េត ហៅឧកញ៉ា ជ័យ និងបក្ខពួកឈ្មោះ សាន ចយ នៅតែអាចធ្វើសកម្មភាពកាប់ឈើនិងដឹកជញ្ជូនឈើចេញទៅស្រុកយួនយ៉ាងពេញបន្ទុកដោយសារមានការឃុបឃិតជាប្រព័ន្ធ។ ជាពិសេសក្នុងខណៈដែលមន្ត្រីជំនាញនិងសមត្ថកិច្ចពាក់ព័ន្ធជាប់រវល់ក្នុងយុទ្ធនាការឃោសនាបោះឆ្នោតពីថ្ងៃទី០៧ដល់ថ្ងៃទី២៧ ខែកក្កដា កន្លងទៅថ្មីៗនេះគឺឈ្មួញឈ្មោះ ម៉ឹក សុផាន់ណារ៉េត ហៅឧកញ៉ា ជ័យ សម្រុកដឹកជញ្ជូនឈើចេញពីស្រុកសេសាន យ៉ាងគឃ្លើន។
ជុំវិញបញ្ហាខាងលើនេះប្រភពពីកម្មករធ្វើការងារនៅក្រុមហ៊ុនទំនប់វារីអគ្គិសនីសេសានក្រោម២ បានបង្ហើបឲ្យដឹងថាកាលពីថ្ងៃទី២៤ ខែកក្កដា ឆ្នាំ២០១៨ កន្លងទៅថ្មីៗនេះពួកគេបានឃើញរថយន្តយីឌុប៥គ្រឿងដឹកឈើមូលរាប់រយម៉ែត្រគូបចេញពីឃ្លាំងស្តុកឈើនៅក្នុងតំបន់ទំនប់វារីអគ្គិសនីសេសានក្រោម២ចេញទៅស្រុកយួនយ៉ាងរលូន។
ប្រភពបានឲ្យដឹងទៀតថា ឈើដែលគរទុកក្នុងឃ្លាំងក្រុមហ៊ុនទំនប់វារីអគ្គិសនីសេសានក្រោម២ រាប់ពាន់ម៉ែត្រគូបដូចសព្វថ្ងៃនេះ គឺជាឈើដែលកាប់មកពីតំបន់ការពារនិងតំបន់អភិរក្សក្នុងស្រុកសេសាន និងស្រុកសៀមប៉ាង ខេត្តស្ទឹងត្រែង។ មន្ត្រីរដ្ឋបាលព្រៃឈើនិងមន្ត្រីបរិស្ថាន ព្រមទាំងសមត្ថកិច្ចពាក់ព័ន្ធដទៃទៀតក្នុងខេត្តស្ទឹងត្រែង មិនហ៊ានប៉ះពាល់ឈ្មួញឈ្មោះ ម៉ឹក សុផាន់ណារ៉េត ហៅឧកញ៉ា ជ័យ នោះទេព្រោះគេដឹងថាឈ្មួញម្នាក់នេះមានខ្នងបង្អែករឹងមាំ ៕
031 33 03 888