ថ្មីៗនេះមន្ត្រីប្រចាំច្រក តំបន់បឹងត្រកួន ស្រុកថ្មពួក ខេត្តឧត្ដរមានជ័យ បានឲ្យដឹងថា បច្ចុប្បន្នឈ្មួញធំៗ មួយចំនួនស ម្រុក នាំចូលទំនិញគេចពន្ធ ទំនិញខុសច្បាប់ និងទំនិញបង់ ពន្ធមិនគ្រប់យ៉ាងពេញ បន្ទុកតាមច្រកបឹង ត្រកួន ដោយ សារ មានការឃុបឃិតបើកដៃ ពីសំណាក់លោក ញឹក ប៊ុនលេខ ប្រធានស្នាក់ការគយ ប្រចាំច្រកនេះ។
ប្រភពបានឲ្យដឹង ទៀតថា សូម្បីតែជ្រូករស់ក៏ ត្រូវឈ្មួញនាំចូលតាម ច្រកតំបន់បឹងត្រកួនយ៉ាងពេញ បន្ទុកដែរដោយសារ លោក ញឹក ប៊ុនលេខ ឃុបឃិតឲ្យឈ្មួញឈ្មោះ សុខ លាង ភេទស្រី តំណាងក្រុមហ៊ុនអង្គរសុខសារឹទ្ធ ធ្វើអ្វីៗតាមអំពើចិត្ត។ ការបន្លំតួលេខចំនួនជ្រូកដែលឈ្មួញនាំចូល គឺជាប្រភពចំណូលដ៏សំខាន់របស់លោក ញឹក ប៊ុនលេខ និងសមត្ថកិច្ចពាក់ព័ន្ធមួយចំនួនទៀតប្រចាំច្រកតំបន់បឹងត្រកួន ដែលជាហេតុធ្វើឲ្យរដ្ឋត្រូវខាតបង់ចំណូលពន្ធយ៉ាងច្រើនក្នុងមួយខែៗ។
ប្រភពពីសមត្ថកិច្ចពាក់ព័ន្ធបានឲ្យដឹងថា តំណាងក្រុមហ៊ុនអង្គរសុខសារឹទ្ធ គឺអ្នកស្រី សុខ លាង បានអះអាងថាក្នុងមួយថ្ងៃក្រុមហ៊ុនខ្លួននាំចូលជ្រូកពីស្រុកសៀមចំនួន២៥០ក្បាលដើម្បីយកទៅចែកចាយតាមទីសត្តឃាតក្នុងរាជធានីភ្នំពេញ និងបណ្ដាខេត្តនានា។
ក៏ប៉ុន្តែជាក់ស្ដែងឈ្មួញនាំចូលជ្រូករស់ក្នុងមួយថ្ងៃ៤រថយន្តហើយក្នុងមួយរថយន្តមានជ្រូកចាប់ពី១២០ក្បាលឡើងទៅ ដូច្នេះលើសពីតួលេខដែលតំណាងក្រុមហ៊ុនអង្គរសុខសារឹទ្ធ បានអះអាងយ៉ាងច្រើន។ ចំណែកលោក ញឹក ប៊ុនលេខ ប្រធានស្នាក់ការគយច្រកតំបន់បឹងត្រកួន កំពុងប្រឈមនឹងការរិះគន់ថាជាអ្នកឃុបឃិតជួយបិទបាំងតួលេខចំនួនជ្រូកដែលឈ្មួញនាំចូលដើម្បីជាថ្នូរនឹងផលប្រយោជន៍។
លោក ញឹក ប៊ុនលេខ ប្រធានស្នាក់ការគយច្រកតំបន់បឹងត្រកួន ស្រុកថ្មពួក ខេត្តបន្ទាយមានជ័យ ត្រូវបានបើកកកាយជាបន្តបន្ទាប់ ជាពិសេសទាក់ទងទៅនឹងករណីឃុបឃិតឲ្យឈ្មួញនាំចូលទំនិញគេចពន្ធ ទំនិញខុសច្បាប់ និងទំនិញបង់ពន្ធមិនគ្រប់កាន់តែច្រើនឡើងៗ។
មានន័យថាអំពើពុករលួយតាមច្រើនរូបភាពរបស់លោក ញឹក ប៊ុនលេខ គឺជារឿងដែលមិនអាចបិទបាំងបានទេ ដូច្នេះលោក គុណ ញឹម ដែលជាមេគយធំមិនគួរមើលរំលងទៅទៀតឡើយ ហើយលោក ឱម យ៉ិនទៀង ប្រធានអង្គភាពប្រឆាំងអំពើពុករលួយ ក៏គួរបើកការស៊ើបអង្កេតឲ្យបានស៊ីជម្រៅទៅលើសំណុំរឿងមួយនេះផងដែរ។ បើមិនដូច្នេះទេលោក ញឹក ប៊ុនលេខ ប្រធានស្នាក់ការគយច្រកតំបន់បឹងត្រកួន ព្រមទាំងបក្ខពួកប្រាកដជាឃុបឃិតគ្នាប្រព្រឹត្តអំពើពុករលួយ កាន់តែខ្លាំងក្លាលើសមុនទៅទៀត។
បញ្ហានេះគឺជារឿងដែលលោក អូន ព័ន្ធមុនីរ័ត្ន រដ្ឋមន្ត្រីក្រសួងសេដ្ឋកិច្ចនិងហិរញ្ញវត្ថុ ក៏ដូចជាលោក គុណ ញឹម ជាអគ្គនាយកគយ មិនគួរបណ្ដែតបណ្ដោយតទៅទៀតទេព្រោះអំពើពុករលួយនិងទង្វើមិនប្រក្រតីរបស់លោក ញឹក ប៊ុនលេខ មេគយច្រកបឹងត្រកួន ត្រូវបានបើកកកាយជាបន្តបន្ទាប់។ ទង្វើរបស់លោក ញឹក ប៊ុនលេខ ប្រធានស្នាក់ការគយច្រកតំបន់បឹងត្រកួន មិនត្រឹមតែធ្វើឲ្យរដ្ឋត្រូវខាតបង់ចំណូលពន្ធយ៉ាងច្រើនក្នុងមួយខែៗប៉ុណ្ណោះទេ គឺធ្វើឲ្យប៉ះពាល់ដល់វិធានការកែទម្រង់ស៊ីជម្រៅនៅក្នុងស្ថាប័នគយ ៕