ប្រជាពលរដ្ឋស្តាយការបាត់បង់ ត្រពាំង និង អូរធម្មជាតិកំពុងក្លាយជាកម្មសិទ្ធិឯកជនខណៈអាជ្ញាធរស្រុកជីក្រែងចេញច្បាប់អនុញ្ញាតឱ្យ គ្រឿងចក្រចូលស្ដាប្រឡាយទឹកចាស់ និងត្រពាំងធម្មជាតិ ធ្វើជាប្រព័ន្ធទឹកស្រោចស្រពស្រូវប្រាំង

សៀមរាប÷ ប្រជាពលរដ្ឋព្រួយបារម្ភណ៍ សោកស្តាយ ត្រពាំង និង អូរធម្មជាតិ ខណះ គ្រឿងចក្រសម្រុកចុះយ៉ាងគគ្រឹកគគ្រេងអមដោយក្រដាសច្បាប់អនុញ្ញាតដោយ អាជ្ញាធរស្រុកជីក្រែងឱ្យ ស្ដារប្រឡាយចាស់និងត្រពាំងនៅតំបន់ ១ តំបន់ ២ និងតំបន់ ៣ ដែលត្រូវបានកាត់ឆ្វៀលមកតំបន់២វិញ ដោយរាជរដ្ឋាភិបាលព្រមទាំងបានចេញប័ណ្ណសំគាល់ដើម្បីឱ្យប្រជាពលរដ្ឋអាស្រ័យផលលើដីរដ្ឋ នៅក្នុងស្រុកជីក្រែងគ្រប់ឃុំទាំងអស់ដែលជាតំបន់ទ្រនាប់នៃបឹងទន្លេសាបដីដែលបានកាត់ឆ្វៀលមកតំបន់ ២ ។ បើយោងតាមប្រភពប្រជាពលរដ្ឋថាបច្ចុប្បន្ននេះមានគ្រឿងចក្រជាច្រេីនគ្រឿងកំពុងតែសម្រុកចុះប្រតិបត្តិការគ្រប់ឃុំដែលមានដីទ្រនាប់បឹងទន្លេសាបទាំងអស់ ។ពួកគាត់បន្តថាគ្រឿងចក្រខ្លះអនុវត្តតាមច្បាប់ ខ្លះទៀតធ្វើលើសច្បាប់ ដោយជីកកកាយអូរធម្មជាតិធ្វើជាកម្មសិទ្ធិឯកជន រឿងដែលពួកគាត់ហួសចិត្តបំផុតគឺការអនុញ្ញាតឱ្យស្ដាត្រពាំងធម្មជាតិដែលជាសម្បត្តិរបស់រដ្ឋធ្វើជាអាងស្តុកទឹករបស់ឯកជន ពួកគាត់អះអាងថាតាំងពីដូនតា មកពួកគាត់មិនដែលឃើញអាជ្ញាធរណា ចេញច្បាប់ឱ្យ ស្ដាត្រពាំងធម្មជាតិមកធ្វើជាកម្មសិទ្ធិឯកជនទេ។ ទើបតែឃើញពេលនេះ ពួកគាត់ថា ធ្វើនេះ គឺជាការលើកទឹកចិត្តឱ្យអ្នកធ្លាប់បំពានព្រៃលិចទឹកត្រែកអរ ដោយមានទឹកគ្រប់គ្រាន់សម្រាប់ ស្រោចស្រពស្រូវរដូវប្រាំងប៉ុន្តែនាំឱ្យប៉ះពាល់ប្រយោជន៍រួមរបស់ប្រជាពលរដ្ឋដែលធ្លាប់នេសាទនៅអូរ ត្រពាំងបឹង  បួរទាំងនោះ ។ជាក់ស្ដែង មានគ្រឿងចក្រ ៥ ទៅ ៧គ្រឿង ដែលមាន មេការ រត់ច្បាប់ ឈ្មោះ ហុីង ភារុន បច្ចុប្បន្ន រស់នៅ ភូមិ អន្លង់ ត្នោត ឃុំ ជីក្រែង ស្រុក ជីក្រែង ខេត្ត សៀមរាប។

បានចុះប្រតិបត្តិការ ភូមិ សាស្ត្រ ឃុំ គោកធ្លកក្រោម និងឃុំ ជីក្រែង ដូចជា ÷ ចំណុចអូរ តានក, ត្រពាំងរាម , អូរចង្វារអៀស ព្រមទាំងត្រពាំងមួយចំនួនទៀត ជុំវិញទំនប់ ចក ត្រពាំង និងអូរធម្មជាតិទាំងនោះកំពុងតែក្លាយជាអាងស្តុកទឹកឯកជនបន្ដើរៗហើយ ។

ពាក់ព័ន្ធ ករណីខាងលើនេះ លោក បូ៊ ម៉េង ទ្រី អភិបាលស្រុក ជីក្រែង ប្រាប់អ្នកសារព័ត៌មាន តាមប្រព័ន្ធ Telegram ថា អាជ្ញាធរចេញច្បាប់ អនុញ្ញាតឱ្យគ្រឿងចក្រចុះ ទៅស្ដារប្រឡាយ ចាស់ និង ស្ដាត្រពាំង ព្រោះប្រជាពលរដ្ឋបានស្នើសុំទៅលោកមេឃុំ ដោយសារពួកគាត់គ្មានទឹកគ្រប់គ្រាន់សម្រាប់ស្រោចស្រពស្រូវរដូវប្រាំង ហើយ បណ្តាមេឃុំទាំងអស់បានដាក់ពាក្យស្នើសុំមកសាលាស្រុក ទើបអាជ្ញាធរស្រុកចេញច្បាប់ អនុញ្ញាត។ លោក នួន គ្រឹះស្ថាន ប្រធាន មន្ទីរ ធនធានទឹក និងឧតុនិយម ខេត្ត សៀមរាប កាលពី ថ្ងៃ អាទិត្យ ទី១២ ខែ ឧសភា ឆ្នាំ ២០២៤បាន ផ្ញើ សារ តាម ប្រព័ន្ធ Telegram ថា លោក បានឱ្យ គ្រឿងចក្រទាំងអស់ផ្អាក និងសុំពិនិត្យច្បាប់បច្ចេកទេសសិន។ ទំនងលោកមិនបានដឹងថា លោក ហុីង ភារុន កំពុងតែធ្វើសកម្មភាព ជីកកកាយយ៉ាងសកម្មនៅ ភូមិ សាស្ត្រ ឃុំ ជីក្រែង និង ឃុំ គោកធ្លកក្រោមឡើយ ខណៈប្រធានមន្ទីរ ធនធានទឹក និងឧតុនិយម ឱ្យផ្អាក សុំពិនិត្យមើលច្បាប់បច្ចេកទេស។ ទោះបីជាយ៉ាងណាក៏ដោយចុះប្រជាពលរដ្ឋនៅតែសោកស្តាយត្រពាំង និងអូរធម្មជាតិដែលបានបាត់បង់ធ្លាក់ទៅលើដៃឯកជន។ ជាចុងក្រោយប្រជាពលរដ្ឋ សូមណូមពរដល់ លោក នួន គ្រឹះស្ថាន មេត្តា ពិនិត្យច្បាប់បច្ចេកទេស មិនគួរមានច្បាប់អនុញ្ញាតឱ្យ ស្ដាត្រពាំង ធម្មជាតិ និងការបំពានច្បាប់របស់ម្ចាស់ស្រែ និងម្ចាស់គ្រឿងចក្រមិនគួរបិទ ឬកាយអូរដែលជាសម្បត្តិរបស់រដ្ឋ មកធ្វើជាកម្មសិទ្ធិឯកជននោះឡើយ។ ទាក់ទងទៅនឹងបញ្ហាទាំងអស់នេះអ្នកសារព័ត៌មានមិនអាចសុំការបកស្រាយពី លោក ហុីង ភារុន បានទេព្រោះទូរស័ព្ទចូលហើយត្រូវបានលោក ចុចផ្ដាច់។ អង្កភាព យើងខ្ញុំ រងចាំការបកស្រាយពីលោករៀងរាល់ម៉ោងធ្វើការ៕