ឈ្មួញដ៏ល្បីឈ្មោះ ចែស្រី បានសម្រុកដឹកជញ្ជូនឈើខុសច្បាប់ពីខេត្តព្រះវិហារ ឆ្ពោះទៅកាន់ខេត្តកំពង់ធំដោយរលូនកាលពីពេលថ្មីៗកន្លងនេះ
ប្រភពពីពលរដ្ឋ បានឲ្យដឹងថា ឈ្មួញរកស៊ីឈើខុសច្បាប់ឈ្មោះ ចែស្រី និងប្តីព្រមទាំងបក្ខពួក មានទំនាក់ទំនងយ៉ាងជិតស្និទ្ធជាមួយលោក ស៊ុ ស៊ីវុត្ថា ហៅ តាវ៉ែនតា នាយផ្នែករដ្ឋបាលព្រៃឈើរវៀងទើបភ្លឺខៀវឲ្យឈ្មួញចៀសផុតពីការបង្ក្រាបជារៀងរហូត។ ជាក់ស្តែងមួយរយៈចុងក្រោយនេះឈ្មួញរកស៊ីខុសច្បាប់ឈ្មោះ ចែស្រី និងប្តីព្រមទាំងបក្ខពួក បានប្រើប្រាស់រថយន្តសាំយ៉ុង ជាច្រើនគ្រឿងដឹកជញ្ជូនឈើពីតំបន់ព្រៃព្រះរកានិងព្រៃឡង់ ខេត្តព្រះវិហារ បានយ៉ាងរំភើយដោយគ្មានមន្ត្រីជំនាញនិងសមត្ថកិច្ចពាក់់ព័ន្ធណាមួយហ៊ានប៉ះពាល់ឡើយ។ ជាពិសេសគឺលោក ស៊ុ ស៊ីវុត្ថា នាយផ្នែករដ្ឋបាលព្រៃឈើរវៀងតែម្តង ត្រូវបានគេដឹងថា កំពុងចាត់ទុកឈ្មួញឈ្មោះ ចែស្រី និងប្តីព្រមទាំងបក្ខពួកនោះ ជាប្រភពចំណូលរបស់ខ្លួនយ៉ាងកាក់កប។
ប្រភពពីសមត្ថកិច្ចពាក់ព័ន្ធនៅក្នុងស្រុករវៀង ខេត្តព្រះវិហារ បានឲ្យដឹងថា នៅក្នុងរយៈពេលប៉ុន្មានយប់កន្លងមកនេះ គឺឈ្មួញឈ្មោះ ចែស្រី និងប្តីព្រមទាំងបក្ខពួករបស់ខ្លួន បានធ្វើសកម្មភាពដឹកជញ្ជូនឈើចេញពីខេត្តព្រះវិហារ ឆ្ពោះទៅកាន់ខេត្តកំពង់ធំនោះ កាន់តែផ្កើននិងច្បាប់យ៉ាងខ្លាំងក្លាជាងមុនទៅទៀត។
ជាមួយគ្នានោះ លោក ប្រាក់ សុវណ្ណ អភិបាលខេត្តព្រះវិហារ លោក នួន សុខុម នាយខណ្ឌរដ្ឋបាលព្រៃឈើខេត្តព្រះវិហារ និងលោក ពឹង ទ្រីដា ប្រធានមន្ទីរកសិកម្មខេត្តព្រះវិហារ មិនបានចាត់វិធានការបង្ក្រាបឈ្មួញដែលរកស៊ីឈើខុសច្បាប់ឈ្មោះ ចែស្រី និងប្តីព្រមទាំងបក្ខពួកនោះឡើយ។ ជាងនេះទៅទៀត លោក កង សៅគុណ មេបញ្ជាការកងរាជអាវុធហត្ថខេត្តព្រះវិហារ និងលោក សួស សុខដារ៉ា ស្នងការនគរបាលខេត្តព្រះវិហារ ក៏រក្សាភាពស្ងៀមស្ងាត់បានល្អប្រសើរផងដែរ។
បើតាមប្រភពមួយចំនួនទៀត បានបញ្ជាក់ថា មានមន្ត្រីធំៗ នៅក្នុងមន្ទីរកសិកម្ម និងរុក្ខាប្រម៉ាញ់ខេត្តព្រះវិហារ ដែលជាបង្អែកដ៏រឹងមាំរបស់ឈ្មួញឈ្មោះ ចែស្រី និងប្តីព្រមទាំងបក្ខពួក ទើបឈ្មួញរូបនេះ ប្រព្រឹត្តិបទល្មើសព្រៃឈើយ៉ាងពេញទំហឹងតែម្តង។ ដូច្នេះហើយ បានជាពលរដ្ឋ លើកឡើងថា ចំពោះលោក កែវ អូម៉ាលីស្ស ប្រធានរដ្ឋបាលព្រៃឈើនៃក្រសួងកសិកម្ម លោកមិនគួរមើលរំលងតទៅទៀតទេ ពីព្រោះលោក នួន សុខុម មេរដ្ឋបាលព្រៃឈើខេត្តព្រះវិហារ មិនហ៊ានបង្ក្រាបបទល្មើសព្រៃឈើឲ្យមានប្រសិទ្ធភាពនោះឡើយ៕ ដោយលោក ភេម ឃាន
031 33 03 888