ហាណូយ៖ ស្ថានឯកអគ្គរាជទូត នៃព្រះរាជាណាចក្រកម្ពុជា ប្រចាំសាធារណរដ្ឋសង្គមនិយមវៀតណាម បានជូនសេចក្តីព័ត៌មានទៅដល់និស្សិត សិក្ខាកាម យោធា-នគរបាល និងបងប្អូនប្រជាពលរដ្ឋខ្មែរកំពុងសិក្សា ស្នាក់នៅ ឬមានវត្តមានក្នុងប្រទេសវៀតណាម ពិសេសទីក្រុងហាណូយ អាជ្ញាធរក្រុងហាណូយបានចេញវិធានការណ៍ពិន័យតឹងរឹង ចំពោះអ្នករំលោភនីតិវិធី Covid-19 ។
យោងតាមស្ថានឯកអគ្គរាជទូត នៃព្រះរាជាណាចក្រកម្ពុជា ប្រចាំសាធារណរដ្ឋសង្គមនិយមវៀតណាម ដដែលបានឱ្យដឹងថា អ្នករំលោភវិធានការពារ Covid-19 របស់ក្រសួងសុខាភិបាលវៀតណាម អាចប្រឈមនឹងការជាប់ទោសពន្ធធនាគារ ១២ ឆ្នាំ។
សម្រាប់អ្នកមិនធ្វើសេចក្តីប្រកាសសុខភាព ឬធ្វើប្រកាសសុខភាពក្លែងក្លាយ ឬមិនប្រកាសពីស្ថានភាពសុខភាព របស់ខ្លួនដោយពេញលេញនឹងត្រូវពិន័យរហូតដល់ ១០០ លានដុង (៤៣៥០ ដុល្លារ) -អ្នកមិនពាក់ម៉ាស់នៅទីសាធារណៈ, លើមធ្យោបាយដឹកជញ្ជូនសាធារណៈ ឬមិនរក្សាគម្លាតដើម្បីការពារ ការឆ្លង នឹងត្រូវពិន័យ ៣ លានដុង (១៣០$)។
អ្នកបោះចោលម៉ាស់មិនត្រឹមត្រូវនឹងពិន័យ ពី ៥ ទៅ ៧ លានដុង (២១៧ $- ៣០៥ $) – អ្នកឆ្លងជំងឺCovid-19 ឬដឹងថាមានអ្នកឆ្លងតែលាក់មិនរាយការណ៏នឹងត្រូវពិន័យ ២០ លានដុង – អ្នកខកខានមិនអនុវត្តបទបញ្ជាស្តីពីការស៊ើបអង្កេត, ការត្រួតពិនិត្យ និងការព្យាបាលតាមវេជ្ជសាស្ត្រ នៅមុនចូល និងចេញពីទីតាំងផ្ទុះ Covid-19 នឹងត្រូវពិន័យ ៣០ លានដុង។
ដោយឡែក អ្នករត់ចេញពីកន្លែងចត្តាឡីស័ក និងខកខានមិនអនុវត្តតាមវិធានចត្តាឡីស័កនឹងត្រូវពិន័យរហូត ដល់២០ លានដុង ឬនឹងមានវិធានការណ៍តាមមាត្រា២៤០ នៃក្រមព្រហ្មទណ្ឌ ប្រសិនបានចម្លង មេរោគទៅជនដទៃ៕
031 33 03 888