ខេត្តកណ្តាល ៖ អភិបាលក្រុងតាខ្មៅលោក នូ សុវណ្ណារ៉ា បានកោះអញ្ជើញម្ចាស់ដេប៉ូ ខ្សាច់ទាំង ១៨ និងម្ចាស់រថយន្តដឹកជញ្ជូនខ្សាច់ នៅទូទាំងក្រុងតាខ្មៅ មកប្រជុំជាបន្ទាន់ ដើម្បីមានវិធានការណែនាំ ចំពោះការដេប៉ូខ្សាច់និងចំពោះរថយន្តណាដឹកជញ្ជូនខ្សាច់មិនត្រឹមត្រូវតាមលក្ខណៈបច្ចេកទេស ។ ជាងនេះទៅទៀត ប្រសិនបើម្ចាស់ដេប៉ូណាមួយល្មើស និងបំរាមណែនាំរបស់អាជ្ញាធរក្រុង និងធ្វើការផ្អាកពិនយ័ចំនួន៣០.០០០០រៀលនិងធ្វើការឃាត់រថយន្តបើធ្ងន់ធ្ងរជាងនេះនិងព្រមានបិទការធ្វើអាជីវកម្មតែម្តង។
លោកអភិបាលក្រុងបានឱ្យដឹងថា ៖ មានរថយន្តដឹកដីខ្សាច់ជាច្រើនគ្រឿងបានដឹកខ្សាច់ពេញ ហួសកំណត់ ហើយមានរថយន្តខ្លះទៀត មិនបានយកកៅស៊ូតង់គ្របឲ្យបានត្រឹមត្រូវនិងដាក់ខ្សាច់ហៀរជ្រុះរប៉ាត់រប៉ាយដែលបង្កឱ្យមានដីខ្សាច់ហុយតាមដងផ្លូវបង្កការប៉ះពាល់សុខភាពដល់ប្រជាពលរដ្ឋជួនកាលបង្កអោយមានគ្រោះថ្នាក់ជារឿយៗផងដែរ។
គួរបញ្ជាក់ថា ៖ កន្លងមក ប្រជាពលរដ្ឋដែលធ្វើដំណើរឆ្លងកាត់ផ្លូវ២១Aបានសំណូមពរដល់អាជ្ញាធរគ្រប់លំដាប់ថ្នាក់ជាច្រើនលើកច្រើនសារអោយអាជ្ញាធរចាត់វិធានការជាបន្ទាន់ណែនាំដល់ម្ចាស់ដេប៉ូខ្សាច់ទាំងនោះ។
លោកអភិបាលក្រុងបានណែនាំដល់ម្ចាស់ដេប៉ូខ្សាច់ទាំងអស់មុននិងដឹកជញ្ជូនត្រូវលាងសម្អាតរថយន្តហើយយកកៅស៊ូតង់គ្របឲ្យបានត្រឹមត្រូវជៀសវាងការដឹកជញ្ជូនហួសកំណត់ស្របតាមលក្ខណៈបច្ចេកទេសដែលស្ថាប័នជំនាញដែលបានណែនាំ។
លោកអភិបាលក្រុងក៏បានអំពាវនាវម្ចាស់ដេប៉ូខ្សាច់និងបណ្តាសប្បុរសជននានាសូមចូលរួមវិភាគទានជាថវិកាតាមសទ្ធាសម្រាប់ទិញរថយន្តបាញ់ទឹកលាងសំអាតផ្លូវអោយមានសោភណ័ភាពស្រស់បំព្រងសក្តិសមជាទីក្រុងស្អាតទេសចរណ៍អាស៊ាន។
គួររំលឹកថា ៖ កន្លងមកនេះ អាជ្ញាធរខេត្តកណ្តាលបានដាក់បទបញ្ជាអោយអាជ្ញាធរក្រុងតាខ្មៅរឹតបន្តឹងការទប់ស្កាត់ដេប៉ូខ្សាច់និងម្ចាស់រថយន្តដឹកជញ្ជូនខ្សាច់ណាដែលមិនអនុវត្តតាមការណែនាំត្រូវចាត់វិធានការជាបន្ទាន់យ៉ាងម៉ឺងម៉ាត់និងមានប្រសិទ្ធភាពបំផុត ៕
031 33 03 888